ԵՐԵՎԱՆ, 10 սեպտեմբերի– Sputnik. «Հյուսիս–հարավ» նոր հայկական լիրիկական կատակերգության երկար սպասված պրեմիերան տեղի է ունեցել հինգշաբթի Երևանի «Մոսկվա» կինոթատրոնում։ Դա ռոմանտիկ կատակերգություն է տարբեր բնավորություն ունեցող չորս ընկերների մասին, որոնց կապում է ուսանողական ընկերությունը։
«Մեր ֆիլմը բարի կատակերգություն է, և դրական էներգիայից բացի, որը մենք ցանկացել ենք փոխանցել մեր հանդիսատեսին, այլ գաղափարներ գրեթե չի պարունակում։ Մեր կյանքն առանց այդ էլ բարդ է, դրանում այնքան շատ խնդիրներ կան, որ երբեմն ուղղակի անհրաժեշտ է լիցքաթափվել, այլ կերպ նայել աշխարհին։ Կարծում եմ, որ մեզ դա հաջողվել է»,– ֆիլմի դիտումից հետո լրագրողներին ասաց գլխավոր պրոդյուսեր Կարեն Ղազարյանը։
Երկրորդ պլանի դերերից մեկում հանդես եկած Սոնա Շահգելդյանն էլ իր հերթին նշեց, որ սա նրա առաջին փորձն է կինոյում։
«Ես ուրախ եմ, որ մասնակցել եմ նման նախագծի և իմ դերասանական ավանդն եմ ունեցել այս ֆիլմում։ Շատ գոհ եմ, կարծում եմ, որ ֆիլմը ստացվել է»,– նշել է։
Դերասան Մկրտիչ Արզումանյանն էլ նշեց, որ շատ է անհանգստացել ֆիլմի հաջողության համար, բայց պարզվել է, որ այդ մտավախություններն իզուր են եղել։
Ֆիլմի սյուժեն սկզբից մինչև վերջ լարվածության մեջ է պահում հանդիսատեսին և ծավալվում բավական անսպասելի ուղղությամբ։ Նրանցից յուրաքանչյուրը զբաղված է իր աշխատանքով, ձգտումներով և ցանկություններով, և ամեն ինչ կշարունակվեր իր հունով, եթե գլխավոր հերոսը` Նվերը, չմտածեր նվեր մատուցել իր ընկերներին և երեկույթ կազմակերպել մեծահարուստ Լամբերտ Խաչատուրովիչի (Մկո) առանձնատանը։
Ֆիլմի համար ընտրվել էին հիմնականում 70-80–ական թվականների հայկական էստրադայի հիթերը։
Ֆիլմի պրոդյուսերը Արման Միտոյանն է, գլխավոր պրոդյուսերը` Կարեն Ղազարյանը, ռեժիսորը` Դավիթ Բաբախանյանը (հայտնի է «Poker AM», «Փեսացուն կրկեսից», «Պահանջվում է միլիոնատեր» ֆիլմերով)։
Գլխավոր դերերում նկարահանվել են «Հայ տղեք» խմբի նախկին անդամներ Միշոն և ՀՏ Հայկոն, դերասաններ Սոս Ջանիբեկյանը, Դավիթ Թովմասյանը, Մկրտիչ Արզումանյանը, հաղորդավար Դիանա Մալենկոն, ինչպես նաև «Ռեինկարնացիա» խմբի մեներգիչ Ռոլանդ Գասպարյանը և երգչուհի Սոնա Շահգելդյանը։
Ֆիլմի բյուջեն կազմել է 480 հազար դոլար։ Կազմակերպիչները նախատեսում են կատակերգությունը ցուցադրել Հայաստանի մարզերում, ինչպես նաև արտասահմանում` Ռուսաստանում, Վրաստանում և ԱՄՆ–ում։
Պրեմիերայի ցուցադրությունից ստացված հասույթը կփոխանցվի հիվանդ երեխաների օգնությանը։
