Փախստականները ԵՄ–ում. բազմություններ ճանապարհին, վրանային ճամբարներն ու բողոքի ցույցերը

Անցած օրվա ընթացքում Հունգարիայի սահմանը հատել են ռեկորդային թվով փախստականներ` 3321 մարդ, ՌԻԱ Նովոստիին հաղորդել են Չոնգարդ շրջանի ոստիկանությունից։ Միգրանտների հոսքը շարժվում է Մակեդոնիայի, Հունաստանի, Սերբիայի, Իտալիայի տարածքներով։ Ապաստան որոնող մարդկանց մեծամասնությունը հույս ունի մտնել Գերմանիա, որտեղ սոցիալական աջակցության համակարգն առավել զարգացած է։

Փախստականների համար տարանցիկ կետ ծառայող երկրներում ստեղծվում են ժամանակավոր ճամբարներ, կազմակերպվում են լրացուցիչ տրանսպորտային երթուղիներ, որոնք բավարար չեն բոլոր ցանկացողներին տեղափոխելու համար։ Ոստիկանները փորձում են վերահսկել միգրանտների հետ կապված իրավիճակը, սակայն նրանց հետ վեճի բռնվելու և չհնազանդվելու բազմաթիվ դեպքեր են գրանցվում։

2015թ.–ի սկզբից Եվրամիության տարածք է ժամանել շուրջ 350 հազար միգրանտ, ամեն օր նրանց շարքերը համալրվում են հազարավոր նոր եկվորներով։ Եվրահանձնաժողովը հայտարարել է, որ ներկա միգրացիոն ճգնաժամը խոշորագույնն է Երկրորդ համաշխարհային պատերազմից ի վեր։ Ավելի վաղ փախստականների հարցերով ՄԱԿ գերագույն հանձնակատար Անտոնիու Գուտերաշը կոչ է արել ԵՄ անդամ երկրներին տեղաբաշխել առնվազն 200 հազար փախստականների, որոնք այժմ գտնվում են Հունաստանի, Հունգարիայի և Իտալիայի տարածքներում։

Ավելի վաղ Եվրահանձնաժողովի ներկայացուցիչ Ալեքսանդր Վինթերսթեյնը հաղորդել էր, որ միգրացիոն ճգնաժամի հետ կապված Եվրահանձնաժողովն ապաստան տրամադրելու, միգրացիայի և ինտեգրացիայի աջակցության հիմնադրամից 5 մլն եվրո կհատկացնի Ավստրիային և 4 մլն եվրո Հունգարիային` որպես ֆինանսական օգնություն։