ԵՐԵՎԱՆ, 9 սեպտեմբերի – Sputnik. Այս շաբաթ Ռոտերդամում դիզայներ Դաան Ռուզգաարդը ներկայացրել է երեք տարիների աշխատանքի և նախագծման արդյունքը` աշխարհի ամենամեծ օդամաքրիչ սարքը։ Այդ աշտարակը ժամում ավելի քան 300 000 խորանարդ մետր օդ է մաքրում աղտոտումից, իսկ հետո սմոգի մասնիկները սեղմում է` վերածելով «թանկարժեք քարերի», որոնք ընդունակ են որպես զարդեր ծառայել մատանիների, ապարանջանների և այլ զարդերի համար։
Սարքը ստացել է «Հակասմոգային աշտարակ» անվանումը։ Դրա աշխատանքի համար պետք է մոտ 1400 վատտ հզորության մշտական էներգիայի աղբյուր, և հեղինակը ծրագրում է ապագայում այն զինել արևային պանելներով։
Աշխատանքային սկզբունքով աշտարակն այդքան էլ չի տարբերվում որոշ իոնային օդամաքրիչներից։ Ինչպես բացատրում է ինքը` Ռուզգաարդը, «էլեկտրոդը դրական իոններ է ուղարկում օդ, դրանք միանում են փոշու փոքրագույն մասնիկներին։ Այնուհետև հակաէլեկտրոդը ձգում է դրական լիցքավորված իոնները փոշու մասնիկների հետ, որտեղ դրանք հավաքվում և պահվում են աշտարակի ներսում։
Տեխնոլոգիան թույլ է տալիս «բռնել» սմոգի նույնիսկ ամենամանր մասնիկները, որոնք չեն կարողանում վերացնել մաքրող այլ համակարգերը»։
Աշտարակում հայտնված փոշին խտացվում է, և դրանից ստացվում են բյուրեղներ։ Տեսականորեն սարքում ճնշումն ավելացնելու դեպքում հակասմոգային աշտարակները կարող են ալմաստներ «պատրաստել» հենց օդից։
Նախագիծն իրականացվել է Պեկինի քաղաքապետարանի գումարով, ինչպես նաև Ռոտերդամի կառավարության դրամաշնորհներով։ Այժմ աշտարակը ծրագրում են ուղարկել Պեկին, ընթացքում, առնվազն երկու կանգառով` Փարիզում և Մումբաիում։ Իսկ առայժմ աշտարակն ընդամենը մեկն է։
