Տնտեսագետ. Հայաստանին ձեռնտու կլինի ԵՏՄ–ի շրջանակում առևտուրն իրականացնել ռուբլով

ԵՐԵՎԱՆ, 8 սեպտեմբերի– Sputnik. ԵՏՄ–ի տարածքում ռուբլով առևտրի իրականացումը բխում է Հայաստանի շահերից, կարծում է տնտեսագետ Արտակ Մանուկյանը։

Երեքշաբթի Բելառուսի Գրոդնո քաղաքում կազմակերպված Եվրասիական միջկառավարական խորհրդի նիստի ժամանակ, ՀՀ վարչապետ Հովիկ Աբրահամյանն առաջարկել է ԵՏՄ անդամ երկրներին ռազմավարական ապրանքների առևտուրն իրականացնել ռուբլով` առանց դոլարի հետ կապ ունենալու։

«Մեծ հաշվով Հայաստանին ձեռնտու է դա, եթե հաշվենք այն փաստը, որ այս պահին մենք ռուսական գազը դոլարով ենք գնում։ Հայաստանը պետք է առաջ տանի իր տնտեսական շահերը և փորձի այդ համատեքստում գազի գինը ֆիքսի ռուսական ռուբլով», – նշել է նա։

Մանուկյանի կարծիքով` այս նախագծի իրատեսականությունը զգալիորեն կախված է Մոսկվային ցանկությունից, քանի որ տնտեսական տեսակետից նման իրավիճակն ամենաքիչը ձեռնտու է Մոսկվային։ 

«Հայաստանի հետ իրականացրած արտաքին առևտրի արդյունքում Ռուսաստանը երկրի ներքին շուկայի համեմատ ավելի «էժան» դոլար է ստանում և առևտուրն իրականացնում ռուբլով», – պարզաբանում է Մանուկյանն` ավելացնելով, որ Հայաստանը պետք է օգտվի այդ հնարավորությունից։

Ինչ վերաբերում է ԵՏՄ–ի շրջանակում միասնական արժույթի ներդրմանը, ապա տնտեսագետի կարծիքով, դա հնարավոր է միայն երկարաժամկետ հեռանկարում` 2020թ.–ից ոչ շուտ։

«Ցանկացած ինտեգրացիոն կառույց որոշակի փուլից հետո միասնական արժույթի անցում է ենթադրում։ Այսպիսով, եթե ԵՏՄ–ն կարողանա կայանալ որպես տնտեսական կառույց, հեռանկարում մեզ մոտ, անկասկած, միասնական արժույթ կգործի», – կարծում է նա։

Նրա խոսքով` միասնական արժույթի ներդրումը դրական կազդի Հայաստանի տնտեսության վրա, քանի որ մասնավոր փոխանցումները հիմնականում իրականացվում են Ռուսաստանից, իսկ միասնական արժույթի արդյունքում հայերը կխուսափեն անցանկալի կորուստներից գումարը դրամի վերածելու դեպքում։ Սակայն, ըստ նրա, Հայաստանը պետք է պատրաստ լինի հավասարապես կիսել ռուսական ռուբլու ճակատագիրը։