ԵՐԵՎԱՆ, 5 սեպտեմբերի– Sputnik. Տաջիկստանում ԱՄՆ դեսպանատունը մտադիր է սեպտեմբերի 8–ին վերսկսել աշխատանքը, որը դադարեցվել էր Դուշանբեում և Վախդատում գրանցված մի շարք ահաբեկչությունների պատճառով, հաղորդել է դեսպան Սյուզան Էլլիոթը Facebook սոցցանցում դիվանագիտական գերատեսչության էջում։
Դուշանբեում ԱՄՆ–ի դեսպանատունն ուրբաթ դադարեցրել է աշխատանքը։ Ավելի վաղ Տաջիկստանի ՆԳՆ–ն տեղեկացրել էր Դուշանբեում և Վախդատ քաղաքում գրանցված զինված հարձակումների մասին։ Պաշտպանական գերատեսչության աղբյուրը ՌԻԱ Նովոստիին հայտնել էր, որ հարձակումների հետևանքով զոհվել է Տաջիկստանի ՆԳՆ–ի և ՊՆ–ի 33 աշխատակից, ինչպես նաև նախկին պաշտպանության փոխնախարար Աբդուխալիմ Նազարզոդի խմբավորման ինը զինծառայող։ Ուրբաթ Տաջիկստանի նախագահը պաշտոնից հեռացրել էր Նազարզոդին` «հանցագործություն կատարելու» համար։ Ինչպես տեղեկացրել է ՆԳՆ–ն, հենց նա է ղեկավարել հարձակումը։
«Տաջիկստանի իշխանությունները շարունակում են քննությունը և ներդրել են անվտանգության ավելի խիստ միջոցներ նախօրեին գրանցված գրոհների հետևանքների կապակցությամբ։ Չնայած Դուշանբեում այս պահին իրավիճակը հանգիստ է, ԱՄՆ–ի բոլոր քաղաքացիներին խորհուդ ենք տալիս զգուշություն դրսևորել և խուսափել մարդկանց մեծ կուտակումներից։ Կոչ ենք անում Դուշանբեում բնակվող ԱՄՆ–ի քաղաքացիներին` դուրս չգալ քաղաքի սահմաններից` Դուշանբեին հարակից բնակավայրերում իրավապահների կողմից իրականացվող գործողությունների պատճառով», – նշվում է հաղորդագրության մեջ։
Հաղորդագրության մեջ նաև նշվում է, որ ԱՄՆ դեսպանատունը նախատեսում է վերսկսել նորմալ աշխատանքը երեքշաբթի` սեպտեմբերի 8–ին ԱՄՆ–ում նշվող Աշխատանքի օրվա տոնից հետո։ Դեսպանատունը շարունակում է ուշադիր հետևել իրադարձությունների զարգացմանը և հնարավորության դեպքում կտրամադրի հետագա տեղեկատվություն։
Տաջիկստանում ԱՄՆ դեսպանատունը մտադիր է վերսկսել աշխատանքը սեպտեմբերի 8–ին
© Sputnik / Сергей Субботин
/ Բաժանորդագրվել
Նախօրեին Դուշանբեում ԱՄՆ–ի դիվանագիտական ներկայացուցչությունը դադարեցրել էր իր աշխատանքը` Տաջիկստանի ՊՆ–ի և ՆԳՆ–ի աշխատակիցների վրա կազմակերպված երկու զինված հարձակումների կապակցությամբ
