Ստանիսլավսկու անվան ռուսական դրամատիկական թատրոնը հյուրախաղերով կմեկնի Ռուսաստան

ԵՐԵՎԱՆ, 5  սեպտեմբերի– Sputnik. Ստանիսլավսկու անվան պետական ռուսական դրամատիկական թատրոնը պատրաստվում է հյուրախաղերով այցելել Մոսկվա և Սանկտ Պետերբուրգ, ասաց թատրոնի գեղարվեստական ղեկավար Ալեքսանդր Գրիգորյանը։

«Մոսկվայում թատրոնը կմասնակցի Ռուսաստանում Հայաստանի օրերի տոնակատարությանը, ինչպես նաև թատերագիր Յուրի Պոլյակովի հոբելյանին։ Հյուրախաղերը կկազմակերպվեն մոտավորապես նոյեմբերի 5–15–ը», – ասաց Գրիգորյանը։

Նրա խոսքով` հյուրախաղերի շրջանակում կներկայացվեն «Ռևիզոր», «Խելքից պատուհաս», «Աֆրոդիտեի ձախ կուրծքը» բեմադրոթյունները։ Սանկտ Պետերբուրգում հյուրախաղերն, ավանդույթի համաձայն, անցկացվում են մարտ–ապրիլին։

Ստանիսլավսկու անվան պետական ռուսական դրամատիկական թատրոնը հիմնադրվել է 1937 թ.–ին` ՀՀ կառավարության որոշմամբ։ Տարածելով ռուսական բեմական մշակույթը` թատրոնը միշտ եղել է ռուսական դասականության ջատագովը։ Նիկոլայ Գոգոլի, Անտոն Չեխովի, Լև Տոլստոյի և Մաքսիմ Գորկու անունները տարիներ շարունակ չեն իջել թատրոնի ազդագրերից։ Թատրոնը միշտ ստեղծել է իր երկացանկն ու ստեղծագործական աշխարհայացքը` գիտակցելով ռեժիսորական արվեստի և դերասանական պրոֆեսիոնալիզմի չափանիշերի մշտական վերաիմաստավորման անհրաժեշտությունը։