ԵՐԵՎԱՆ, 5 սեպտեմբերի– Sputnik. Նախօրեին առաջին անգամ Երևանում համերգ ունեցավ Իսրայելի ֆիլհարմոնիկ նվագախումբը` աշխարհահռչակ դիրիժոր Զուբին Մեթայի գլխավորությամբ։
Համերգն անցկացվեց «Երևանյան հեռանկարներ» փառատոնի շրջանակում և կազմակերպվել էր ՀՀ նախագահ Սերժ Սարգսյանի բարձր հովանու ներքո։
Բազմաթիվ մրցանակների արժանացած լեգենդար հնդիկ դիրիժոր Զուբին Մեթան, որի պատվին աստղ է բացվել Հոլիվուդի Աստղերի ճեմուղում, ևս մեկ անգամ ապացուցեց, որ խմբավարն առեղծվածային մասնագիտություն է։
Չէ՞ որ, ըստ էության, չգործադրելով ոչ մի նյութական, զգալի ջանք` ընդամենը դիրիժորական փայտիկի թափահարումով մաեստրոն անէությունից ստեղծում էր երաժշտական կերպարներ։ Այս կախարդանքը գրեթե երկու ժամ շարունակ իր իշխանության տակ էր պահում ոչ միայն նվագախմբի մի քանի տասնյակ երաժիշտներին, որոնք ամբողջովին հնազանդվում էին Վարպետի կամքին, այլ նաև Ալ. Սպենդիարյանի անվան օպերայի և բալետի ազգային ակադեմիական թատրոնի լեփ–լեցուն դահլիճը։
Ուրախալի է, որ հանդիսատեսը և հատկապես երիտասարդները պատրաստ էին նստել անգամ աստիճաններին, որպեսզի ունկնդրեն աշխարհահռչակ դիրիժորի ղեկավարած նվագախմբի ելույթը։
Զուբին Մեթայի համերգը դարձավ նաև մեծանուն երաժշտի կամքի ուժի ապացույցը։ Թեև ծնկի վիրահատության պատճառով բժիշկներն արգելել էին նրան մեկ ամսվա ընթացքում ելույթ ունենալ, այդուհանդերձ, նա եկավ Երևան։ Եվ անգամ որոշ երաժիշտների առողջական վիճակի հանկարծակի վատացումը չխանգարեց աշխարհի լավագույն նվագախմբերից մեկին ելույթ ունենալ իրեն հատուկ փայլով` անգամ փոքր–ինչ փոխելով համերգի ծրագիրը։
Դե ինչ… Երաժշտության շքեղ տոնը կայացավ։ Հայաստանի և համայն հայության մշակութային մայրաքաղաքում հնչեցին հանճարեղ Շտրաուսի, Շյոնբերգի և Չայկովսկու ստեղծագործությունները։
Մնում է հուսալ, որ համերգը բարեկամության ևս մի կամուրջ կկառուցի ցեղասպանություն վերապրած հայերի և հրեաների միջև, ինչպես նաև խթան կդառնա հարաբերությունների հետագա կարգավորման և բարեկամության ամրապնդման համար։
