Փորձագետ. հակառուսական պատժամիջոցները կարող են անուղղակի կերպով ազդել Հայաստանի վրա

ԵՐԵՎԱՆ, 4 սեպտեմբերի– Sputnik. Արևմտյան պատժամիջոցները կարող են անուղղակի կերպով ազդել Հայաստանի տնտեսության վրա, Sputnik Արմենիա պորտալին ասաց ԱՊՀ երկրների ինստիտուտի հայկական մասնաճյուղի տնօրեն, քաղաքագետ Ալեքսանդր Մարկարովը` մեկնաբանելով այն փաստը, որը Արևմուտքը որոշել է նոր պատժամիջոցներ կիրառել Ռուսաստանի նկատմամբ։

Մարկարովի կարծիքով` արևմտյան պատժամիջոցներն առաջին հերթին ազդում են Ռուսաստանի վրա, ինչի հետևանքով երկրում կտրուկ վատացել է տնտեսական իրավիճակը։ Իսկ քանի որ Ռուսաստանի տնտեսությունը սերտորեն կապված է հայկականի հետ, ապա  չի բացառվում, որ այդ պատժամիջոցները բացասաբար ազդեն նաև Հայաստանի վրա

Ռուսաստանի նկատմամբ ԵՄ–ի և ԱՄՆ–ի պատժամիջոցների ցանկը կարող է ընդլայնվել։ ՌԴ–ի նկատմամբ նոր պատժամիջոցներ կարող են սահմանվել այն դեպքում, երբ Դոնեցկի և Լուգանսկի ինքնահռչակ ժողովրդական հանրապետությունների իշխանությունները հրաժարվեն տեղական ընտրություններ անցկացնել հոկտեմբերի 25–ին։ Այդ օրը նմանատիպ ընտրություններ կանցկացվեն Ուկրաինայի տարածքում։ Արևմտյան դիվանագիտական շրջանակում հայտարարում են, որ եթե ԴԺՀ–ն և ԼԺՀ–ն զիջումներ չանեն տեղական ընտրությունների ժամկետների հարցում, ապա Արևմուտքը կմեղադրի նրանց Մինսկի պայմանավորվածությունները ձախողելու մեջ, իսկ մեղավորը կլինի Մոսկվան։

Միաժամանակ քաղաքագետը կարծում է, որ ուկրաինական ճգնաժամի կողմերից յուրաքանչյուրը յուրովի է տեսնում այն։ Արևմուտքն ունի խնդրի սեփական տեսլականը, Ռուսաստանն էլ` իրենը։

«Բոլոր կողմերն ունեն խնդրի իրենց տեսլականը։ Կրեմլը կարծում է, որ պատժամիջոցներն անհիմն են, իսկ Արևմուտքն այս հարցում այլ կարծիքի է։ Ուկրաինական ճգնաժամում Արևմուտքը մեղադրում է հենց Ռուսաստանին և առավել նպատակահարմար է համարում այդ երկրի նկատմամբ պատժամիջոցներ կիրառել։ Արևմտյան քաղաքական գործիչները կարծում են, որ Կրեմլը պակաս դերակատարություն չի ունեցել այս հակամարտության մեջ», – նշեց նա։

Ինչ վերաբերում է Ուկրաինայում նախատեսված տեղական ընտրություններին, ապա, քաղաքական գործչի խոսքով, Կիևը ձգտում է ընտրություններ կազմակերպել և՛ ԼԺՀ–ում, և՛  ԴԺՀ–ում և նման կերպ օրինականացնել իր ներկայությունն այդ տարածքում։

«Հնարավոր է, որ Կիևում կարծում են, թե Դոնեցկի և Լուգանսկի ժողովրդական հանրապետությունները, որպես Ուկրաինայի մաս, պարտավոր են մասնակցել տեղական ընտրություններին։ Իսկ այդ չճանաչված հանրապետությունների ռուսամետ ղեկավարներն իրենց հերթին կարծում են, որ մասնակցությունն ընտրություններում ընդգծում է միայն նրանց կապը Կիևի հետ։ Եվ հավանական է, որ ընտրություններ այնտեղ կամ տեղի չեն ունենա, կամ կանցկացվեն այլ ձևաչափով», – ընդգծեց նա։