Առանց խուճապի. ինչպես Հայաստանն արձագանքեց Ադրբեջանում տեղի ունեցած երկրաշարժին

ԵՐԵՎԱՆ, 4 սեպտեմբերի– Sputnik. Ուրբաթ առավոտյան` տեղի ժամանակով 08։49–ին, Երևանի և մի քանի հայկական քաղաքների ու գյուղերի բնակիչները զգացին  ստորգենտյա ցնցումներ, որոնց պատճառը Ադրբեջանի տարածքում տեղի ունեցած երկրաշարժն էր։

Ստորգետնյա ցնցումների ուժն էպիկենտրոնում կազմել է 7-8 բալ, Հայաստանում երկրաշարժը զգացվել է Վանաձորում, որտեղ նրա ուժը կազմել է 2-3 բալ, Ստեփանավանում, Կապանում (3 բալ), Իջևանում, Նոյեմբերյանում (4 բալ), Չորաթանում (3-4 բալ), Այգեձորում (4-5 բալ)։ Երևանում ցնցումների ուժը կազմել է 3-4 բալ։

Sputnik Արմենիա պորտալը հավաքել է այն քաղաքների բնակիչների մեկնաբանությունները, որոնք զգացել են ստորգետնյա ցնցումները։

Իջևան

Ադրբեջանին սահմանամերձ քաղաքի բնակիչները զգացել են ցնցումները, բայց խուճապ չի եղել։ Բնակչությանը հիմա ավելի շատ անհանգստացնում է սահմանին տիրող իրավիճակը, քան երկրաշարժը։

Ստեփանավան

Ցնցումներն աննշան են եղել, բնակիչներից շատերը դրանք նույնիսկ չեն զգացել։

«Կյանքն ընթանում է իր սովորական հունով, նույնիսկ խուճապի ակնարկ չկա»,– Sputnik Արմենիա պորտալին պատմեց  Վարզադատը` Լոռու մարզում գտնվող այդ փոքր քաղաքի բնակիչներից մեկը։

Վանաձոր

Վանաձորի բնակիչների համար նույնպես անհանգստության առիթ չկար։ Նրանցից շատերն ընդհանրապես տեղյակ չեն եղել պատահածից, իսկ նրանք, ովքեր ցնցումները զգացել են, հանգիստ շարունակել են զբաղվել իրենց գործերով։

Կապան

Սյունիքի մարզի այդ քաղաքը նույնպես գտնվում է Ադրբեջանի հետ սահմանի մոտ։ Ականատեսները պատմում են, որ «մի քանի վայրկյան ցնցումներ են եղել, ջահերը շարժվել են, բայց ոչ ոք չի հասցրել վախենալ»։

Երևան

Երևանցիների մեծամասնությունն այդ ժամանակ զբաղված էր աշխատանքի, դպրոց և բուհեր գնալով, ուստի նրանք խուճապի մատնվելու ժամանակ չունեին։ Սակայն նրանք, ովքեր տանն եղել և զբաղվել են տնային գործերով, ցնցումները զգացել են։

«Ցնցումը, իսկ գուցե դրանք երկուսն էին, հորիզոնական հարթությունում է եղել, սակայն այն ուժեղ չի եղել»,– Sputnik Արմենիա կայքին ասաց Ելիզավետան, ով բնակվում է քաղաքի կենտրոնում։

Երևանի ծայրամասերի բնակիչներից շատերը պատմում են, որ ցնցումներն այնքան են զգացվել, որ բնակարաններում ջահերը սկսել են ճոճվել։

Սակայն դա նույնպես խուճապ չի առաջացրել. ոչ ոք չի լքել բնակարանը կամ հավաքել «տագնապի ճամպրուկը»։

Մենք հիշում ենք…

Անկասկած, հայերի հիշողության մեջ դեռ երկար կապրեն Սպիտակի սարսափելի երկրաշարժի արձագանքները, որի արդյունքում մասամբ կամ լիովին ավերվեցին  ավելի քան 300 բնակավայրեր, այդ թվում` Սպիտակ, Վանաձոր, Ստեփանավան, Լենինական (այժմ Գյումրի) քաղաքները։ Ողբերգությունը տեղի էր ունեցել 1988թ.–ի դեկտեմբերի 7–ին, խլել ավելի քան 26 հազարի մարդու կյանք և անօթևան թողել շուրջ կես միլիոն մարդու…