Պամելա Անդերսոնը ցանկանում է Ռուսաստանի հետ միասին պաշտպանել ծովաշներին

ԵՐԵՎԱՆ, 3 սեպտեմբերի-Sputnik. Անվանի ամերիկացի դերասանուհի և կենդանիների պաշտպան Պամելա Անդերսոնը ցանկանում է Ռուսաստանի հետ միասին պաշտպանել ծովաշներին։ Այդ մասին նա հայտարարել է հինգշաբթի Արևելյան տնտեսական համաժողով այցելության ընթացքում։

«Ես ցանկանում եմ վաղը համաժողովում ուղերձով հանդես գալ… Ցանկանում եմ Ռուսաստանի հետ միասին ինչ–որ նշանակալի բան անել, որն իսկապես կարող է որևէ բան փոխել։ Պետք է սկսել ծովաշներից։ Գիտեմ, որ ծովաշներից պատրաստված մթերքներ են առաքվում Ռուսաստան»,– լրագրողներին ասել է Անդերսոնը։

Ավելի վաղ անվանի հոլիվուդյան դերասանուհին Sea Shepherd կազմակերպության կայքում բաց նամակ էր տեղադրել` հասցեագրված ՌԴ նախագահ Վլադիմիր Պուտինին և խնդրել էր արգելել այն նավին անցնել Հյուսիսային ծովային ճանապարհով, որը տեղափոխում է 1,7 հազար տոննա կետ Իսլանդիայից և Ճապոնիայից։ Դրանից հետո բնապահպանության նախարարը նրան հրավիրել էր Վլադիվոստոկ` Կանադայում սպիտակ արջերին սպանելը և այլ հրատապ խնդիրներ քննարկելու համար։

«Ես նամակ եմ գրել նախագահ Պուտինին։ Այնուհետև նախարար Դոնսկոյն ինձ հրավիրել է այստեղ։ Հիանալի է հանդիպել մարդկանց հետ, խոսել շրջակա միջավայրի մասին, միավորել մեր ջանքերը, ավելի կոնկրետ խոսել օվկիանոսի, կետերի, շրջակա միջավայրի բազմազանության մասին։ Մոլորակն աղետի մեջ է, ուստի ես ցանկացել եմ գալ այստեղ և հանդիպել նախագահ Պուտինի հետ, ելույթ ունենալ համաժողովում և քննարկել այն, թե մենք ինչպես կարող ենք ինչ–որ բան փոխել»,– հավելել է դերասանուհին։

Նրա խոսքով` ինքը չի իմացել, թե իրեն ինչ է սպասում, երբ մեկնել է Վլադիվոստոկ, քանի որ Ռուսաստանը մեծ առեղծված է, հատկապես ամերիկացիների և կանադացիների համար։

«Երբ ես եկա, տեսա, թե որքան շատ մարդիկ են մտահոգված շրջակա միջավայրի դրությամբ, կլիմայի փոփոխություններով, ոչնչացման եզրին գտնվող տեսակներով` սպիտակ արջերով, կետերով։ Ես ուրախ էի տեսնել, որ մարդիկ այդքան անհանգստանում են։ Ես կպատմեմ այդ մասին Ամերիկայում»,– ասել է Անդերսոնը։