ԱՏՀ–ի մասնակիցներից մեկը կարող է անուն տալ հազվագյուտ ընձառյուծին

ԵՐԵՎԱՆ, 3 սեպտեմբերի– Sputnik. «Ընձառյուծի երկիր» ազգային պարկը և «Հեռավորարևելյան ընձառյուծներ» կազմակերպությունը Արևելյան տնտեսական համաժողովի շրջանակում տեղի ունեցած բարեգործական աճուրդին ներկայացրել են յուրահատուկ լոտ, որն իրավունք է տալիս անուն տալ հեռավորարևելյան ընձառյուծին, հաղորդել է «Ընձառյուծի երկիր» ազգային պարկի հասարակայնության հետ կապերի գլխավոր մասնագետ Մարիա Օկուլովան։

«Համաժողովում աշխատանքն է սկսել բարեգործական աճուրդը` ուղղված շրջակա միջավայրի և Հեռավոր Արևելքի հազվագյուտ կենդանիների պաշտպանությանը։ «Ընձառյուծի երկիրը» և «Հեռավորարևելյան ընձառյուծները» համաժողովի բոլոր մասնակիցներին յուրահատուկ հնարավորություն են տվել` դառնալ Leo 42M համարով ընձառյուծի պահողը, որը հազվագյուտ ամենախոշոր կատվի պոպուլյացիայի ներկայացուցիչ է, որից աշխարհում 80 հատ է մնացել»,– ասաց Օկուլովան։

Նրա խոսքով` Leo 42M ընձառյուծը 3-4 տարեկան է։ Տարբեր ֆոտոթակարդներով արված լուսանկարները վկայում են, որ նա սիրում է ակտիվ շարժվել իրեն տրամադրած տարածքում։ Լուսանկարներից երևում է, որ Leo 42M–ը բավականին թմբլիկ է, նշանակում է, որ նա որսի հետ կապված խնդիրներ չունի։

«Սպասվում է, որ գիշատչին անվանելու իրավունքը կխաղարկվի համաժողովի աշխատանքի առաջին օրը, իսկ մի քանի օրերի ընթացքում կհայտարարվի ընձառյուծի անունը։ Աճուրդին հավաքված միջոցները կտրամադրվեն արգելոցներին, ազգային պարկերին և բնապահանական կազմակերպություններին»,– ասել է զրուցակիցը։

Հեռավորարևելյան ընձառյուծը մոլորակի խոշոր կատվազգիներից ամենահազվագյուտն է։ Ընձառյուծի որսը 1956թ.–ից արգելված է, նա գրանցված է Կարմիր գրքում։ Այդ գիշատչի թիվը Ռուսաստանում հասնում է 70–ի, նրանց մեծ մասը բնակվում է Պրիմորիեի երկրամասում` «Ընձառյուծի երկիր» ազգային պարկի տարածքում։ Ֆոտոթակարդների օգնությամբ 2014թ.–ին այնտեղ նկատել են 57 կետավոր գիշատչի։