Հայկական գրականությունն իր ընթերցողին է գտնում Մոսկվայի գրքի տոնավաճառում

ԵՐԵՎԱՆ, 3 սեպտեմբերի– Sputnik. Համառուսական ցուցահանդեսային կենտրոնում նախօրեին բացված Գրքի միջազգային XXVIII ցուցահանդես–տոնավաճառի շրջանակում ներկայացվել է նաև Հայաստանի տաղավարը, որն անչափ հետաքրքրել է հյուրերին։

Հայկական պատվիրակությունը 12–րդ անգամ է մասնակցում Մոսկվայի ցուցահանդես–տոնավաճառին։ Տաղավարում ներկայացված են Հայոց ցեղասպանության 100–րդ տարելիցին նվիրված հայերեն և ռուսերեն գրքեր։ Հայոց ցեղասպանության 100–րդ տարելիցը 2015թ.–ին նշվում է Հայաստանում և սփյուռքի համայնքներում։

Ինչպես Sputnik–ի թղթակցի հետ զրույցում նշեց «Բուկինիստ» ցանցի հիմնադիր–տնօրեն Խաչիկ Վարդանյանը, ցուցահանդեսը նոր է մեկնարկել, սակայն առանձնահատուկ ոգևորություն դեռևս չի նկատվում։

«Իրավիճակն ավելի է վատանում։ Մարդկանց թիվն ու հետաքրքրությունը նվազում է։ Ցուցադրության ծավալն անընդհատ կրճատվում է։ Սակայն մենք ունենք մեր նախագծերը, ծրագրերը, հանդիպումներ են նախատեսված տարբեր գործընկերների հետ։ Աշխատում ենք, համագործակցում։ Եվ այսուհետ շարունակելու ենք», – ընդգծեց նա։

Գրքի շուկայում նկատվող հետընթացի խնդիրը Ռուսաստանում այդքան էլ սուր չի զգացվում, ինչպես Հայաստանում։ Այդուհանդերձ, պայմանագրեր կնքվում են։

Ռուսաստանը նախկինի պես մնում է Հայաստան գիրք մատակարարող առաջատար երկիրը։ 100 անուն գրքից 70–ը ռուսերեն է։ Չնայած, Վարդանյանի գնահատականով, ընթերցանության համամասնությունը 50/50 է (ռուսերեն և հայերեն)։

Ինչպես նշում են տոնավաճառի հյուրերը, Հայաստանում ընթերցում են հիմնականում այն նույն գրականությունը, ինչ Ռուսաստանում։ Իհարկե, ի տարբերություն Ռուսաստանի, Հայաստանում պահանջարկ չեն վայելում պատմական գրականությունն ու սլավոնական մոգության մասին գրքերը։

Գրքի միջազգային XXVIII ցուցահանդես–տոնավաճառի ամենահարուստ և ներկայացուցչական հյուրն այս տարի Իրանն է, որն ունի ամենամեծ տաղավարը։ Իրանի ցուցադրությունը բացել է ներկայացուցչական կառավարական պատվիրակությունը, իսկ պատվավոր հյուրն է ՌԴ Պետդումայի խոսնակ Սերգեյ Նարիշկինը։