Ընթերցողները որոշել են, թե որն է Ագաթա Քրիստիի ամենահայտնի վեպը

ԵՐԵՎԱՆ, 2 սեպտեմբերի – Sputnik. «Տասը փոքրիկ նեգր» ստեղծագործությունը բրիտանացի գրող Ագաթա Քրիստիի ամենահայտնի ստեղծագործությունն է, հայտնում է Lenta.ru–ն` հղում անելով The Guardian–ին։

Երկրպագուները առցանց քվեարկության միջոցով են որոշել, թե որն է հայտնի գրողի լավագույն ստեղծագործությունը։ Քվեարկությանը մասնակցել է ավելի քան 15 հազար մարդ։

Երկրորդ տեղում է «Սպանություն Արևելյան ճեպընթացում», իսկ երրորդ` «Ռոջեր Աքրոյդի սպանությունը» ստեղծագործությունները։

Քրիստիի թոռը` Մեթյու Պրիչարդը, նշել է, որ քվեարկության արդյունքը սպասելի էր։ «Սա այն աշխատանքներից է, որով իմ տատիկը հպարտանում էր։ Ես կզարմանայի, եթե «Տասը փոքրիկ նեգր» ստեղծագործությունը առաջատարը չլիներ։ Սա արժանի հաղթանակ է», – ընդգծել է նա։

Քվեարկությունն անցկացրել են գրողի 125-ամյակի կապակցությամբ, որը նշվելու է սեպտեմբերի 15-ին։

«Տասը փոքրիկ նեգր» ստեղծագործությունը ընդգրկված չէ Էրքյուլ Պուարոյի և միսս Մարփլի մասին պատմող շարքում։ Պատմության հերոսները տասը տարբեր մասնագիտություններ, սոցիալական կարգավիճակ ունեցող և տարբեր տարիքի մարդիկ են, որոնք միաժամանակ հայտնվել են գողտրիկ անմարդաբնակ կղզում։ Հանկարծ նրանք մեկը մյուսի հետևից սկսում են տարօրինակ պատճառներով մահանալ։

Այսօր աշխարհում վաճառվել է գրքի ավելի քան 100 մլն օրինակ։ «Տասը փոքրիկ նեգր» ստեղծագործությունը համարվում է պատմության մեջ ամենահաջողակ դետեկտիվ վեպերից մեկը։ Ստեղծագործությունը բազմաթիվ անգամ խաղացել են թատրոնի բեմում, նրա հիման վրա մի քանի ֆիլմ է նկարահանվել։

Քրիստիի խուզարկուները հայտնի են դարձել 1920-ական թվականներից հետո։ Գրողը ստեղծել է 80 վեպ և պատմվածքների ժողովածու, ինչպես նաև 19 երկ, որոնք թարգմանվել են աշխարհի ավելի քան 70 լեզվով, և, որոշ տվյալների համաձայն, տպաքանակով զիջում են միայն Աստվածաշնչին ու Շեքսպիրի ստեղծագործություններին։