Փորձագետ. Հայաստանը բացասական տնտեսական ազդակների ազդեցության տակ է

ԵՐԵՎԱՆ, 1 սեպտեմբերի– Sputnik. Տնտեսական ազդակներն աշխարհում այսօր բացասական են` հատկապես հաշվի առնելով Չինաստանում սկսված ճգնաժամը, «Sputnik-Արմենիա» ռադիոյի հարցազրույցում ասել է քաղաքական վերլուծաբան Արմեն Գրիգորյանը։

Նա նշել է, որ չնայած Չինաստանի իշխանությունների կողմից իրականացված միջամտությոնները որոշակի իմաստով հետաձգեցին ճգնաժամը, սակայն այն միանշանակ կշարունակվի։

«Տարեսկզբին Հայաստանում տնտեսական աճը կանխատեսվում էր 4–5 տոկոսի սահմաններում, սակայն հետագայում ՀԲ–ի ուսումնասիրությունները ցույց տվեցին, որ անհնար է հասնել նման ցուցանիշների», – նշում է Գրիգորյանը։

Փորձագետի խոսքով` համաշխարհային շուկայում տեղի կունենան կառուցվածքային փոփոխություններ, և դա լուրջ ազդեցություն կունենա համաշխարհային տնտեսության վրա` հաշվի առնելով արդեն իրականացվող միտումները` էժան փողերի քաղաքականությունը, որն այս պահին հատկապես ակտիվորեն է դրսևորվում ասիական շուկայում։

«Այս առումով Հայաստանն ամենաֆենոմենն է, որովհետև ինքը էժան փողի քաղաքականություն չի վարում, վարում է թանկ փողի քաղաքականություն, արդյունքում դա կազդի հայկական արտադրության վրա», – կարծում է Գրիգորյանը։

Ինչպես ավելի վաղ հայտարարել է ՀՀ վարչապետ Հովիկ Աբրահամյանը, Հայաստանում տնտեսական աճը առաջին կիսամյակի արդյունքում կազմել է մոտ 4 տոկոս։ Միաժամանակ երկրի 2015 թ.–ի պետբյուջեում ՀՆԱ–ի աճն ամրագրված է 4,1 տոկոսի չափով։