Մեծ Բրիտանիայում չհալվող պաղպաղակ են ստեղծել

ԵՐԵՎԱՆ, 1 սեպտեմբերի–Sputnik. Մեծ Բրիտանիայի Alton Towers ժամանցային այգու հյուրերը հնարավորություն կունենան փորձել չհալվող պաղպաղակ, որի բաղադրատոմսն արտադրողները գաղտնի են պահում։

Հայտնի բրիտանացի շեֆ խոհարար Հեսթոն Բլյումենթալը պատրաստել է պաղպաղակ, որը չի հալվում անգամ ամենակիզիչ արևից։ Չնայած պաղպաղակի բաղադրատոմսը գաղտնի է պահվում, սակայն թղթակիցներին հաջողվել է իմանալ, որ պաղպաղակը երկար ժամանակ պահպանում է իր ձևը հատուկ ջերմային մշակման շնորհիվ։ Վանիլային պաղպաղակը վաճառելու են Մեծ Բրիտանիայի Սթաֆորդ կոմսության տարածքում գտնվող Alton Towers ժամանցային այգում։ Առաջին հիսուն գնորդները պաղպաղակը կստանան անվճար։

Ավելի վաղ` 2013 թ.–ին, Հարվարդից ինժեներ Դևիդ Էդվարդսը ստեղծել էր WikiPearls պաղպաղակը, որը չի հալվում ձեռքում` կոկոսից կամ արախիսից պատրաստված թաղանթի շնորհիվ։ Պաղպաղակը վաճառվում է ԱՄՆ–ի և Մեծ Բրիտանիայի մի քանի խանութներում և ունի երեք համ` մանգո, շոկոլադ և վանիլային։

Չհալվող պաղպաղակը Հեսթոն Բլյումենթալի առաջին արտասովոր հայտնագործությունը չէ։ Նա սիրում է զարմացնել իրեն պատկանող The Fat Duck ռեստորանի այցելուներին` պատրաստելով, օրինակ, բեկոնից պաղպաղակ, շիլա խխունջերից կամ սև խավիարից` սպիտակ շոկոլադով։ Խոհարարն ակտիվորեն օգտագործում է գիտական տեխնոլոգիաներն ու հայտնի է դարձել որպես մոլեկուլյար խոհանոցի հիմնադիր` սնունդ պատրաստելիս օգտագործելով չոր սառույց, հեղուկ ազոտ և ցենտրիֆուգ։