Փորձագետ. Եգիպտոսի նոր հանքավայրերի հայտնաբերումից հետո տարածաշրջանում արագ փոփոխություններ չեն լինի

ԵՐԵՎԱՆ, 31 օգոստոսի– Sputnik. Միջերկրական ծովում նոր գազային հանքավայրի հայտնաբերումն առաջիկայում չի կարող ազդել տարածաշրջանի իրավիճակի վրա, Sputnik Արմենիա պորտալին ասաց ԵՊՀ իրանագիտության ամբիոնի վարիչ Վարդան Ոսկանյանը։

Կիրակի` օգոստոսի 30–ին, Իտալիայի Eni առաջատար նավթագազային ընկերությունը հայտարարել է, որ Միջերկրական ծովում` Եգիպտոսի ափամերձ տարածքում, գազի խոշոր հանքավայր է հայտնաբերվել։ Ընկերության հայտարարության համաձայն, հանքավայրը «հսկայական բացահայտում է» բնական գազի ոլորտում։ Zohr նոր հանքավայրի ներուժը, որի մակերեսը մոտ 100 քառակուսի կիլոմետր է, կարող է կազմել մոտ 850 մլրդ խորանարդ մետր գազ։

«Տարածաշրջանային իրավիճակն առաջիկայում դժվար թե փոխվի Միջերկրական ծովում նոր գազային հորանցքի բացման կապակցությամբ։ Արմատական փոփոխություններ կարելի է ակնկալել միայն այն ժամանակ, երբ այդ շուկա մտնի Իրանը, այսինքն` Իրանի նկատմամբ տնտեսական պատժամիջոցների ամբողջական վերացումից հետո», – ասաց նա։

Այս կապակցությամբ Ոսկանյանն ավելացրեց, որ հարկավոր է լուծել մի շարք տեխնիկական հարցեր, մասնավորապես` կառուցել գազատար, իսկ դրա համար կպահանջվի շատ ժամանակ և ռեսուրս։

Նա ընդգծեց, որ Հայաստանի համար հիմա գազի հիմնական մատակարարը Ռուսաստանն է։

«Եվ այստեղ ևս իրավիճակը կարող է փոխվել միայն Իրանի նկատմամբ կիրառվող տնտեսական պատժամիջոցների վերացումից հետո», – ավելացրեց նա։