ԵՐԵՎԱՆ, 31 օգոստոսի–Sputnik. Ռուս գործարար Գերման Ստերլիգովին ձերբակալել են Մոսկվայի Դոմոդեդովո օդանավակայանում, հայտնել է գործարարի փաստաբան Արթուր Հայրապետովը։
«Գերման Ստերլիգովին ձերբակալել են սահմանին` Դոմոդեդովո օդանավակայանում։ Ամենայն հավանականությամբ, խոսքը ոչ թե միջազգային, այլ ԱՊՀ գծով միջպետական հետախուզման մասին է», – ասել է Հայրապետովը։
Փաստաբանը հիշեցրել է, որ Ստերլիգովն այլևս չի հետախուզվում Ինտերպոլի գծով։ «Կարող եմ միայն ենթադրել, որ դա պաշտոնական Բաքվի «ձեռքի գործն է», որը Ստերլիգովի նկատմամբ միջպետական հետախուզում է հայտարարել ԱՊՀ երկրներում, սակայն ավելի հստակ չեմ կարող ասել», – ավելացրել է Հայրապետովը։
Ռուս ձեռներեց Գերման Ստերլիգովը հայտնի ֆերմեր է, «Ալիսա» բորսայի հիմնադիրը։ Հուլիսի սկզբին հայտնի էր դարձել, որ նա ընտանիքով Ռուսաստանից տեղափոխվել է Լեռնային Ղարաբաղ։
