Մահացել է հայտնի հայ գործարար և բարերար Վահագն Հովնանյանը

ԵՐԵՎԱՆ, 31 օգոստոսի–Sputnik. Երկուշաբթի 83 տարեկանում մահացել է հայտնի հայ գործարար, բարերար, Հայաստանի գոլֆի ազգային ասոցիացիայի նախագահ և «Վահագնի թաղամասի» կառուցապատող Վահագն Հովնանյանը։

Այս տեղեկությունը հաստատել է Հայաստանի գոլֆի ազգային ասոցիացիայի գլխավոր քարտուղար և գլխավոր մարզիչ Կարեն Հովհաննիսյանը։

ԶԼՄ–ների տվյալով` Հովնանյանի մոտ ուռուցքային հիվանդություն է ախտորոշվել։ 

Վահագն Հովնանյանը ծնվել է Իրաքի Քիրքուք քաղաքում, ավարտել է Ֆիլադելֆիայի Սուրբ Ջոզեֆի համալսարանը` ստանալով բակալավրի աստիճան ֆիզիկայի ոլորտում։

1959թ.–ին Հովնանյանն ու նրա եղբայրները հիմնադրել են Hovnanian Brothers Corporation կորպորացիան, որտեղ նա զբաղեցրել է փոխնախագահի պաշտոնը։ Հաջորդ տասը տարիների ընթացքում Հովնանյան եղբայրները մշակել են բազմաթիվ նախագծեր և կառուցել հազարավոր տներ Նյու Ջերսի նահանգում։

1969թ.–ին Հովնանյանը հիմնել է Hovbilt Inc. սեփական շինարարական ընկերությունը, որը հետագա տարիներին մեծ հաջողությունների է հասել բնակելի համալիրների կառուցման ոլորտում։ 

Շահույթի աճին զուգընթաց ձևավորվել են մի քանի դուստր ընկերություններ`տարբեր ուղղվածություններով, որոնք ներառվել են V.S. Hovnanian Group, Inc–ում, այդ ընկերությունների թվում են Adelphia Water Company–ն, Adelphia Sewer Company–ն, Hovnanian Realty–ն, Clear Title Agency–ն և Grandview Cable–ը։

1985թ.–ին Հովնանյանն ու նրա որդին` Շանթը, ստեղծել են CellularVision Inc հեռահաղորդակցական ընկերությունը, որը հետագայում վերանվանվել է SpeedUS, Inc–ի։

Վահագն Հովնանյանն Ամերիկայի ամենահարուստ մարդկանցից է։ ԱՄՆ–ում նրա անունը հայտնի է գործարար շրջանակում։

1988թ.–ի Սպիտակի ավերիչ երկրաշարժից հետո Հովնանյանը նպաստել է կրթության զարգացմանը, նախաձեռնել է դրամահավաք և հարյուր հազարավոր դոլարներ փոխանցել Ամենայն Հայոց Կաթողիկոս Վազգեն Առաջինին` աղետի գոտում նոր դպրոցներ և ուսումնական հաստատություններ կառուցելու նպատակով։