Փորձագետ. Չինաստանի դեմ սահմանված պատժամիջոցները պայմանավորված են ավանդական կիբեռպատերազմով

ԵՐԵՎԱՆ, 31 օգոստոսի– Sputnik. ԱՄՆ–ն պատրաստվում է պատժամիջոցներ սահմանել չինական ընկերությունների դեմ, ինչը պայմանավորված է Չինաստանի և ԱՄՆ–ի միջև ընթացող կիբեռպատերազմով, «Sputnik Արմենիա» լրատվական պորտալին ասաց տեղեկատվական անվտանգության փորձագետ Սամվել Մարտիրոսյանը։

Washington Post–ի տվյալով` նախագահ Օբամայի վարչակազմը տնտեսական պատժամիջոցներ է մշակում չինական ընկերությունների դեմ, որոնք կապ ունեն ամերիկյան կազմակերպությունների տվյալների բազաների ցանցահենային գրոհների հետ։ «Չինացիներն օգտագործում են իրենց պետական ցանցահենային ներուժը ոչ միայն քաղաքական, այլ նաև տնտեսական լրտեսություն իրականացնելու համար` փորձելով հասանելիություն ստանալ ամերիկյան բարձր տեխնոլոգիաների նկատմամբ», – ասաց Մարտիրոսյանը։

Նրա խոսքով` հենց այդ պատճառով ԱՄՆ–ի արձագանքն ամբողջովին կանխատեսելի է։ «Այլ հարց է, որ ԱՄՆ–ն առավել ագրեսիվ պետություն է կիբեռգրոհների ցանցահենային ակտիվության տեսակետից», – ավելացրեց փորձագետը։