Մուտքն արգելված է. Նիկիտա Միխալկովն Ուկրաինայում դարձել է անցանկալի անձ

ԵՐԵՎԱՆ, 31 օգոստոսի– Sputnik. Ուկրաինայի անվտանգության ծառայությունն արգելել է երկիր մուտք գործել Ռուսաստանի արվեստի և ԶԼՄ–ների մի շարք ներկայացուցիչների, այդ թվում` դերասան և ռեժիսոր Նիկտա Միխալկովին, հաղորդում է «Ապոստրոֆ» հրատարակությունը։

Ինչպես նշում է հրատարակությունը, այդ մասին գերատեսչությունը հայտարարել է` ի պատասխան տեղեկատվական հարցման։

«Ուկրաինայի անվտանգության ծառայությունն արգելել է երկրի տարածք մուտք գործել մշակույթի և ԶԼՄ–ների 16 գործիչների։ Մասնավորապես, Ուկրաինայում անցանկալի անձ են հայտարարվել ռուս հրապարակախոսներ Վլադիմիր Կուչերենկոն, Եգոր Խոլմոգորովը և Միխայիլ Խազինը։ Բացի այդ, ցուցակում ներառված են արվեստի 13 գործիչներ` Օլեգ Գազմանով, Իոսիֆ Կոբզոն, Վալերիա Պերֆիլովա (բեմական անունը` Վալերիա), Իոսիֆ Պրիգոժին, Սերգեյ Բեզռուկով, Միխայիլ Բոյարսկի, Նիկոլայ Ռաստորգուև, Իվան Օխլոբիստին, Միխայիլ Պորեչնիկով, Գրիգորի Լեպս, Ժերար Դեպարդյե, Ստանիսլավ Պյեխա (Ստաս Պյեխա) և Նիկիտա Միխալկով»,– հաղորդում է հրատարակությունը։

Առաջին անգամ ՌԴ արվեստի գործիչների «սև ցուցակը» հրապարակվել է օգոստոսի սկզբին, սակայն Միխալկովը ցուցակում չի եղել։

«Ուկրաինայի տարածք մուտք գործելն արգելել են Ուկրաինայի անվտանգության ծառայության մարմինները գործող օրենսդրության պահանջներին համապատասխան` ելնելով պետական անվտանգության ապահովման շահերից»,– մեջբերում է հրատարակությունն ՈՒԱԾ հաղորդագրությունը։

Ավելի վաղ Ուկրաինայի գերագույն ռադան որոշել էր ժամանակավորապես դադարեցնել Ուկրաինայի պետական իշխանության մարմիններին կից 100 ռուսական ԶԼՄ–ների հավատարմագրումը մինչև Դոնբասում ռազմական գործողության ավարտը։ Կիևում ՈՒԱԾ աշխատակիցներն, առանց պատճառները բացատրելու, ձերբակալել են ռուսական ալիքների լրագրողների, որից հետո վերադարձրել են Ռուսաստան, և նրանց մուտքն արգելվել է Ուկրաինա հինգ տարվա ընթացքում։