ԵՐԵՎԱՆ, 31 օգոստոսի — Sputnik. ԱՄՆ նախագահ Բարաք Օբամայի վարչակազմը նախաձեռնել է ամերիկյան կազմակերպությունների տվյալների բազաների նկատմամբ ցանցահենային գրոհներին առնչություն ունեցող չինական ընկերությունների դեմ պատժամիջոցների մշակումը, երկուշաբթի հայտնում է Washington Post թերթը։
Պատժամիջոցների տվյալ փաթեթն «աննախադեպ» է կոչվել։ Ընդգծվում է, որ այն մշակվում է «չինացի ընկերությունների և անհատների նկատմամբ, ովքեր եկամուտներ են ստանում կառավարության կողմից ամերիկյան առևտրային գաղտնիքների կիբեռհափշտակություններից»։ Միաժամանակ նշվում է, որ «այս հարցով որոշում առայժմ չի ընդունվել»։ Սակայն «եզրափակիչ զանգն ակնկալվում է շուտով, հնարավոր է` նույնիսկ երկու շաբաթվա ընթացքում»։
«Նմանատիպ պատժամիջոցների սահմանումն ԱՄՆ–ի վարչակազմի կողմից չինացի հաքերների նախաձեռնած կիբեռտնտեսական լրտեսության` աճող ալիքի պատասխանը կլինի։ Հաքերներն ասում են, որ ամերիկացի պաշտոնական անձինք գողանում են ամեն ինչ` ատոմային էլեկտրակայանների նախագծերից մինչև էներգետիկ ընկերությունների գաղտնի տվյալներ»,– գրում է թերթը։
Նյութում ասվում է, որ ցանկացած «նմանատիպ գործողություն հատկապես զգայուն կլինի աշխարհի երկու խոշորագույն տնտեսությունների հարաբերությունների համար»։ Միաժամանակ նշվում է, որ Վաշինգտոնի և Պեկինի միջև «արդեն կա լարվածություն մի շարք հարցերի վերաբերյալ` ներառյալ Հարավչինական ծովի իրավիճակը և ՉԺՀ ջանքերն ազգային արժույթի արժեզրկման ուղղությամբ` շուկայի վերջին ցնցումների ֆոնին»։ Այս բոլոր թեմաները` ներառյալ կիբեռանվտանգությունը, կքննարկվեն առաջիկա այցի ժամանակ։
ԱՄՆ–ն բազմից Չինաստանը և Ռուսաստանն անվանել է գլխավոր կիբեռվտանգ։ Դեռ 2011 թվականի նոյեմբերին ազգային հակահետախուզության վարչությունն ԱՄՆ կոնգրեսին ուղղված զեկույցում ասել էր, որ այդ երկու երկրների ցանցահեններն առավել ակտիվ են փորձում համացանցով ներթափանցել պաշտպանված սերվերներ, որտեղ պահվում է տնտեսական և պաշտպանության վերաբերյալ տեղեկություն։ Չինաստանը բազմիցս հերքել է իր առնչությունը կիբեռտարածքում ցանկացած տեսակի գործողություններին և հայտարարել է չինական համացանցում ամերիկյան կիբեռակտիվության մասին։
ԶԼՄ. ԱՄՆ–ն պատրաստում է կիբեռգրոհների պատճառով պատժամիջոցներ մտցնել Չինաստանի դեմ
Բաժանորդագրվել
Ամերիկյան իշխանությունները վստահ են, որ չինացի հաքերներն ամերիկյան առևտրային արժեքավոր գաղտնիքներ են գողանում և լրտեսում են ատոմային էլեկտրակայանների և էներգետիկ ընկերությունների նախագծերին
