ԵՐԵՎԱՆ, 28 օգոստոսի – Sputnik. Օգոստոսի 27-ին տեղի ունեցավ «Միություն —2015. Հաղթանակի ժառանգներ-Հայաստան» միջազգային երիտասարդական ռազմամարզական մրցույթ-հավաքի փակման հանդիսավոր արարողությունը, հայտնում է ՀՀ պաշտպանության նախարարության մամուլի ծառայությունը:
Փակման հանդիսավոր արարողությանը ներկա էր ՀՀ պաշտպանության նախարար Սեյրան Օհանյանը, ով անձամբ պարգևատրեց հաղթող թիմերին:
ԱՊՀ անդամ 12 պետությունների ռազմամարզական-կադետական վարժարաններ ներկայացնող պատանիները խառը սկզբունքով կազմված դասակների կազմում օրեր շարունակ տարբեր մրցաձևերում պայքարում էին լավագույնի տիտղոսին արժանանալու համար: Երկշաբաթյա պայքարի արդյունքում հաղթող ճանաչվեցին հետևյալ թիմերը՝ «Ալֆա»՝ 3-րդ հորիզոնական, «Դեսանտուրա»՝ 2-րդ հորիզոնական, «ԱԱՀՋ» (Արագ արձագանքման հատուկ ջոկատ)՝ 1-ին հորիզոնական:
Լրագրողների հետ զրույցում Սեյրան Օհանյանը, կարևորելով նման միջոցառումները երիտասարդության հայրենասիրական դաստիարակության գործում, գոհունակություն հայտնեց միջոցառման ընթացքից և արձանագրված արդյունքներից:
«Ամենակարևորն այն է, որ մրցումներն անցկացվել են ընկերականության մթնոլորտում, հաղթել է միասնությունն ու բարեկամությունը: Ես բազմիցս կրկնել եմ, որ մեր սերնդակիցների ձեռք բերած արժեքները պետք է փոխանցվեն ապագա սերունդներին, որպեսզի ձեռքբերումներն ու հաղթանակներն ապարդյուն չլինեն», — նշել է պաշտպանության նախարարը:
Շնորհավորելով արտերկրից ժամանած պատվիրակություններին ու հավաք-մրցույթի կազմակերպիչներին՝ Սեյրան Օհանյանն ընդգծեց մրցույթի նախապատրաստական կազմակերպչական աշխատանքների ու մասնակիցների ընդհանուր պատրաստվածության բարձր մակարդակը: Պաշտպանության նախարարը կարևորեց այն հանգամանքը, որ Հայաստանում ռազմամարզական մրցույթ հավաքն անցկացվեց նախկին խորհրդային միության պետությունների և հատկապես հայ ժողովրդի համար առանձնահատուկ տարում՝ Մեծ Հայրենականի հաղթանակի 70-ամյակին և Հայոց Ցեղասպանության 100-ամյա տարելիցին նվիրված միջոցառումների շրջագծում։
«Ես կարծում եմ, որ հավաքի 12-ամյա փորձառությունը Հայաստանում իր գագաթնակետին է հասել: Մեր ժառանգներն արժանի հետնորդներ են. ապագան նրանցն է, և նրանք հաղթանակի իրական կրողներն են լինելու: Ժամանակակից աշխարհում շատ բարդ է մեկ ժողովրդի, մեկ պետության համար կառուցել իր ապագան: Նմանատիպ միջոցառումների միջոցով մենք կերտում ենք ընդհանուր հաղթանակ, ընդհանուր կարողություններ, որպեսզի ապագան էլ միասին կառուցենք: Պատերազմն իսկապես վատ երևույթ է, ու նրանք, ովքեր երբևէ պատերազմ տեսել են, չեն ցանկանա երբեք այլևս տեսնել դա: Այն գիտելիքները, որ դուք այստեղ ստացել եք, պետք է օգտագօրծեք միայն ամբողջ աշխարհում խաղաղություն պահպարնելու համար», — իր խոսքում նշեց պաշտպանական գերատեսչության ղեկավարը:
«Միություն - 2015. Հաղթանակի ժառանգներ-Հայաստան» ռազմամարզական մրցույթ-հավաքն ավարտվեց
20:53 28.08.2015 (Թարմացված է: 20:54 28.08.2015)
© Sputnik / Asatur Yesayants
Բաժանորդագրվել
Երկշաբաթյա պայքարի արդյունքում հաղթող ճանաչվեցին «Ալֆա», «Դեսանտուրա» և «ԱԱՀՋ» թիմերը
