Արմեն Ջիգարխանյան. ես մինչև հիմա սիրում եմ Գուրչենկոյին

ԵՐԵՎԱՆ, 28 օգոստոսի — Sputnik. Հայ, խորհրդային և ռուս դերասան Արմեն Ջիգարխանյանը 7 дней.ру պարբերականին տված հարցազրույցում խոստովանել է իր սերը ռուսական թատրոնի և կինոյի աստղ Լյուդմիլա Գուրչենկոյի նկատմամբ։

«Ես կարող եմ խոստովանել, որ մինչև հիմա սիրում եմ Լյուսյային։ Անկեղծ»,– խոստովանել է Ջիգարխանյանը։

Դերասանը հիշում է, որ իրենց ռոմանտիկ հարաբերությունները սկսվել են Վիկտոր Տրեգուբովիչի «Հին պատեր» ֆիլմի նկարահանումների ժամանակ 1973 թվականին։

«Մենք նրա հետ կատարում էինք արդեն ոչ երիտասարդ զույգի դեր, ովքեր սիրահարվել են։ Եվ երբ ես նրան գրկում էի, համբուրում էի տեսախցիկի առաջ, այնպիսի զգացողություն էր, որ դա անհրաժեշտ է ոչ միայն Աննա Սմիռնովային, ում նա մարմնավորում էր, այլև հենց Լյուսային։ Այո, դա ճիշտ է, երբ մենք կիրք էինք խաղում, այնպիսի զգացողություն էր, որ մենք երկուսս էլ ցանկանում էինք դա»,– ասել է Ջիգարխանյանը։

Նա նշել է, որ հասկանում է ամերիկացի դերասաններին, ովքեր սիրահարվում են և ամուսնանում նկարահանումների ժամանակ, որպեսզի իրական զգացմունքներ ապրեն։

«Եթե լինեինք Հոլիվուդում, ապա Լյուսյայի հետ հաստատ կամուսնանայինք։ Սակայն մենք ապրում էինք այլ երկրում, մեզ ավելորդություն թույլ չտվեցինք։ Չգնացինք մինչև վերջ»,- խոստովանել է Ջիգարխանյանը։