ԵՐԵՎԱՆ, 27 օգոստոսի – Sputnik. Հարավարևելյան արևադարձային հոսանքների Շնորհիվ Հայաստանում արդեն սեպտեմբերի 2-ից օդի ջերմաստիճանը 3-5 աստիճանով կբարձրանա, հայտնեց ՀՀ ՏԿԱԻՆ Հիդրոմետ ծառայության օդերևութաբանության կենտրոնի պետի տեղակալ Գագիկ Սուրենյանը։
«Օգոստոսի 30-ից օդային հոսանքները կփոխեն իրենց ուղղությունները, և Սկանդինավիայից ներթափանցած սառը հյուսիսարևմտյան օդային զանգվածներին փոխարինելու կգան արևադարձային հարավարևմտյան հոսանքները», –հինգշաբթի «Sputnik-Արմենիա» միջազգային մամուլի կենտրոնում կազմակերպված ասուլիսի ժամանակ ասաց Սուրենյանը։
Օդերևութաբանն ընդգծեց, որ Հայաստանում այս ամառը շոգ օրերի քանակով ռեկորդային էր վերջին 172 տարիների ընթացքում։
«Արարատյան դաշտավայրում և Երևանում հուլիս–օգոստոս ամիսներին 20 օր շարունակ օդի ջերմաստիճանը տատանվում էր 38-39 աստիճանի, իսկ 15 օր շարունակ` 40-41 աստիճանի սահմանում», – նշեց Սուրենյանը։
Նրա խոսքով` հուլիսն առանձնացել է չոր կլիմայական պայմաններով, տեղումների քանակը ամսական նորմայի ընդամենը 30-50%–ն է կազմել։ Շոգերը շարունակվել են մինչև օգոստոսի 21-ը ներառյալ, և մինչև այդ օրը հանրապետության տարածքում տեղումներ գրեթե չեն եղել։
Իսկ արդեն օգոստոսի 22-ից եղանակը կտրուկ փոխվել է, Սև ծովից հանրապետության տարածք ներթափանցած ցիկլոնը, որը պահպանվում է մինչ օրս, իր հետ անձրև և ամպրոպ է բերել։
Օդերևութաբանը նշեց, որ օգոստոսի 22-ի երեկոյան ժամերին Արմավիրի, Արարատի շրջանների մի շարք գյուղերում ուժեղ կարկուտ է տեղացել, ինչպես նաև նկատվել է քամու ուժգնացում։ Սկանդինավիայի տարածքից հյուսիսարևմտյան ցիկլոնի հետ հանրապետություն են թափանցել արկտիկական սառը օդային զանգվածները, ինչի հետևանքով եղանակը կտրուկ սառել է։
«Եթե մինչև օգոստոսի 21-ը օդի միջին ջերմաստիճանը նորմայից բարձր է եղել 5-8 աստիճանով, ապա արդեն օգոստոսի 22-ից այդ ցուցանիշը նորմայից նվազել է 5-7 աստիճանով։ Ներկա պահին հանրապետության ողջ տարածքում օդի ջերմաստիճանը նորմայից ցածր է 5-6 աստիճանով», – նշեց Սուրենյանը և ավելացրեց, որ տեղումների քանակը որոշ շրջաններում բազմակի անգամ գերազանցել է նորման։
«Կոտայքի Ֆանտան գյուղում երեք ժամում ամսական տեղումների քանակը կրկնակի շատ է եղել, մայրաքաղաքում` նորմայի 300-400%–ի սահմանում։ Իսկ Արարատի շրջանի Արտաշատ քաղաքում տեղումների քանակը այդ ժամանակահատվածում ամսական նորմայից տասն անգամ շատ է եղել», – ընդգծեց նա։
Օդերևութաբանը նշեց, որ մոտակա օրերին ցիկլոնը կթուլանա, և տեղումների քանակը կկրճատվի։
Օրվա երկրորդ կեսին և գիշերային ժամերին կարճատև անձրևներ և ամպրոպ է սպասվում։ Օգոստոսի 30-ից մինչև սեպտեմբերի 1-ը տեղումներ են սպասվում միայն Լոռու, Տավուշի, Սյունիքի, Շիրակի մարզերում և Արցախում։
Արկտիկական օդային հոսանքները գերիշխելու են հանրապետության տարածքում մինչև օգոստոսի 29-ը ներառյալ, այդ օրերին կպահպանվի ցածր ջերմաստիճանային ֆոնը։ «Օդի ջերմաստիճանը ցերեկային ժամերին կկազմի 24-26 աստիճան, իսկ գիշերը կտատանվի 12-14 աստիճանի սահմաններում», – նշեց Սուրենյանը։
Ցածր ջերմաստիճանը կգերիշխի Լոռու, Տավուշի, Սյունիքի մարզերում և Արցախում, այստեղ ցերեկային ժամերին ջերմաստիճանը չի գերազանցի 18 աստիճանը, սպասվում են անձրևներ և մառախուղ։ Մյուս շրջաններում տեղումներ չեն սպասվում։
Օգոստոսի վերջին օրերին և սեպտեմբերի սկզբին Երևանում և Արարատյան դաշտավայրում, ըստ օդերևութաբանի, ջերմաստիճանը կլինի նորմայի սահմանում` 28-30 աստիճան։
Օդերևութաբան. եկող շաբաթվանից Հայաստանում օդի ջերմաստիճանը 3-5 աստիճանով կբարձրանա
© Sputnik / Samvel Sepetchyan
Բաժանորդագրվել
Օգոստոսի վերջին տասնօրյակում որոշ մարզերու, ինչպես նաև Երևանում տեղումների քանակը բազմակի անգամ գերազանցել է նորման
