ԵՐԵՎԱՆ, 27 օգոստոսի – Sputnik. Հայաստանը յոթերորդ տեղում է «Fox news» հեռուստաընկերության կայքում հրապարակած այն երկրների վարկանիշում, որոնք նախկինում գտնվում էին ռազմական գործողությունների գոտում, իսկ այժմ համարվում են «դրախտավայր հանգստի համար»։
Հոդվածում, մասնավորապես, նշվում է, որ 1512-1735 թվականները Հայաստանի մայրաքաղաքը փոխվել է մի քանի անգամ։ «Այդուհանդերձ` որպես Հայաստանի ամենաողբերգական էջ, մարդկանց հիշողության մեջ մնացել են Հայոց ցեղասպանության 1915-1918 թվականների իրադարձությունները», – նշում է հրատարակությունը։
Իսկ այսօր Հայաստանը դարձել է ամենանախընտրելի բյուջետային ուղղություններից մեկը եվրոպական զբոսաշրջիկների համար։ 2014 թվականին դեպի Հայաստան արտասահմանյան զբոսաշրջիկների թիվը հասել է 1.2 միլիոնի` ավելանալով 11.3%-ով 2013 թվականի համեմատ։
«Շնորհիվ «ՄԻՐ» զբոսաշրջային կորպորացիայի` Հայաստանը նաև դարձել է գրավիչ ամերիկացի զբոսաշրջիկների համար։ Լեռնային լանդշաֆտը հնարավորություն է ընձեռում տարբեր տիպի ակտիվ հանգստի կազմակերպման համար», – գրում է Fox news–ը։
Հայաստանը մշակութային առումով` որպես առաջին պետություն, որն ընդունել է քրիստոնեությունն իբրև պետական կրոն, նույնպես առաջարկելու բան ունի։ Բազմաթիվ եկեղեցիներ և վանական համալիրներ միշտ բաց են այցելության համար։
«Հայաստանը նաև տարբերվում է հուսալի հասարակական տրանսպորտով և համեմատաբար ցածր գներով։ Այսպես, օրինակ, մեկ գիշերը հինգաստղանի հյուրանոցում կարժենա մոտավորապես 130 ԱՄՆ դոլար», – գրում է Fox news–ը։
Դրախտային հանգիստ առաջարկելու առումով Հայաստանի «մրցակիցներն են» Կոլումբիան, Հարավային Աֆրիկան, Նիկարագուան, Հյուսիսային Իռլանդիան, Ռուանդան, Խորվաթիան, Բիրման և Յամայկան։
«Fox news»–ը Հայաստանն անվանել է «հանգստի դրախտավայր»
Բաժանորդագրվել
Հայաստանը զբոսաշրջիկների համար ապահովում է հուսալի հասարակական տրանսպորտ և համեմատաբար ցածր գներ
