Ուկրաինայի հարցով շփման խմբի բանակցություններն են մեկնարկել Մինսկում

ԵՐԵՎԱՆ, 25 օգոստոսի – Sputnik. Մինսկի կենտրոնում գտնվող «Պրեզիդենտ հոթելում» չորեքշաբթի մեկնարկել է Ուկրաինայի իրավիճակի կարգավորման շուրջ եռակողմ շփման խմբի բանակցությունները, հայտնում է Բելառուսի ԱԳՆ–ն։

Օրակարգն անփոփոխ է։ Ինչպես բանակցությունների ժամանակ հայտնել է Լուգանսկի ինքնահռչակ հանրապետության լիազոր ներկայացուցիչ Վլադիսլավ Դեյնեգոն, կքննարկվեն «նույն հարցերը», ինչ անցած հանդիպումներին, քանի որ, նրա խոսքերով, ոչ մի ուղղությամբ զգալի առաջընթաց չի նկատվում։ Ուկրաինայի նախկին նախագահ, բանակցություններին Կիևի ներկայացուցիչ Լեոնիդ Կուչմայի մամուլի քարտուղար Դարյա Օլիֆերը հայտնել է, որ շփման խմբի մասնակիցները կքննարկեն Մինսկի համաձայնագրերի բոլոր բաղկացուցիչների իրականացման հարցերը։

Հիմնական հարցերից մեկը Դոնբասից 100 միլիմետրից փոքր տրամաչափի սպառազինության տարհանումն է։ Շփման խմբի նախորդ հանդիպման ժամանակ` օգոստոսի 3-ին, փաստաթուղթը չի հաջողվել համաձայնեցնել, չնայած կողմերը քննարկում էին այն երկու օրերի ընթացքում։