ԵՐԵՎԱՆ, 26 օգոստոսի — Sputnik. Գիտնական–ֆիզիկոս Սթիվեն Հոքինգը նոր գաղափար է առաջ քաշել այն մասին, թե ինչ է կատարվում սև խոռոչում հայտնված տեղեկության հետ, հայտնում է Ստոկհոլմի թագավորական տեխնոլոգիական ինստիտուտի կայքը։
Ստոկհոլմում կայացած համաժողովում նա ասել է, որ իրականում սև խոռոչները չեն կլանում և չեն ոչնչացնում տեղեկությունը։ Սթիվեն Հոքինգը ենթադրել է, որ տեղեկությունն ընդհանրապես չի ընկնում սև խոռոչ։
Դրա փոխարեն տեղեկությունը մշտապես գրվում է երկչափ հոլոգրամի տեսքով սև խոռոչի իրադարձությունների հորիզոնում, անդառնալիության կետում։ Միաժամանակ, այդ տեղեկությունը խառնվում է` երկչափ հոլոգրամները պահում են այն «քաոսային, անօգուտ ձևով»։ Ինչպես կարծում է Հոքինգը, այդ տեղեկությունը գործնական օգտագործման համար անիմաստ է։
Սակայն ֆիզիկոսը կարծում է, որ տեղեկությունը կարող է «դուրս պրծնել» սև խոռոչից, եթե այն անմիջապես դրա մեջ չի ընկնում։
«Սև խոռոչների վերաբերյալ այլընտրանքային տեսությունների գոյությունը ենթադրում է, որ դա հնարավոր է։ Սև խոռոչը պետք է մեծ լինի, և եթե այն պտտվում է, ապա հնարավոր է անցնել մեկ այլ տիեզերք։ Բայց դուք չեք կարողանա հետ վերադառնալ մեր տիեզերք»,– Հոքինգի խոսքը մեջբերում է Ստոկհոլմի թագավորական տեխնոլոգիական ինստիտուտի կայքը։
Այն հարցը, թե ինչ է կատարվում օբյեկտների ֆիզիկական վիճակի տեղեկության հետ, երբ դրանք կուլ է տալիս սև խոռոչը, տասնյակ տարիներ մտահոգում էր գիտնականներին։ Քվանտային մեխանիկայի օրենքներով, այդ տեղեկությունը չպետք է անհետանա անկախ նրանից, թե ինչ է դրա հետ կատարվում, նույնիսկ եթե օբյեկտը հայտնվում է սև խոռոչում, ասվում է հոդվածում։
Սթիվեն Հոքինգը հայտնել է, որ սև խոռոչից կարելի է դուրս գալ
15:49 26.08.2015 (Թարմացված է: 15:50 26.08.2015)
Բաժանորդագրվել
Ֆիզիկոսը ենթադրել է, որ սև խոռոչները չեն կլանում և չեն ոչնչացնում տեղեկությունը։ Այն մշտապես տեսագրվում է որպես հոլոգրամ սև խոռոչի իրադարձությունների հորիզոնում, բայց այնքան է խառնվում, որ դրա կիրառումն անհնար է դառնում։
