Մարմնեղ կանայք Instagram-ում բոյկոտ են հայտարարել Քսենյա Սոբչակին

ԵՐԵՎԱՆ, 24 օգոստոսի — Sputnik. Փարթամ կազմվածքով կանայք իսկական ինտերնետային արշավ են սկսել ֆրանսիական L'Officiel ամսագրի ռուսալեզու տարբերակի գլխավոր խմբագիր, հեռուստահաղորդավարուհի Քսենյա Սոբչակի դեմ։

Ամեն ինչ սկսվել է Սոբչակի` գեր կանանց մասին վերջերս արած արտահայտությունից և խոստովանությունից այն մասին, որ ինքը չի սիրում գեր մարդկանց։

«Ընկերներ, հետաքրքրությամբ ընթերցեցի նիհար մարդկանց մասին արված հիանալի մեկնաբանությունը։ Ես չեմ սիրում գեր մարդկանց։ Այսինքն` ես դեռ կարող եմ հասկանալ գեր մարդկանց, որոնք գեր են հիվանդության պատճառով, սակայն մյուսներին` ոչ։ Ես երբեք չեմ հասկացել և արդեն գուցե չհասկանամ Քարդաշյանի «հետույք առանց սահմանների» ֆենոմենը, սակայն ուրախ եմ, որ նորաձևության աշխարհում նիհար լինելը նախկինի պես պարտադիր պայման է մեծ հաջողության հասնելու համար, և պետք չէ զբաղվել ինքնախաբեությամբ։ Կոմերցիոն մոդելներն ու Victoria’s Secret–ի «հրեշտակներն» ամենևին այլ, զանգվածային հատված են։ Հենց այդ պատճառով ես միշտ տարակուսանքով եմ կարդում ձեր «արժեքավոր» խորհուրդները կրծքի մեծացման և այլ անհեթեթությունների մասին։ Չկա ավելի գեղեցիկ բան, քան նիհար, մարզված մարմինը։ Իսկ գեր և  բարեմասնություններով կանանց… թողեք բեռնատարների վարորդներին»,–  գրել է Սոբչակն Instagram–ում։

Ի պատասխան` փարթամ կազմվածքով կանայք սկսել են Ինստագրամում #саматыжирная հեշթեգով լուսանկարներ հրապարակել։ Այդ հեշթեգով հարյուրավոր նկարներ արդեն լցրել են Instagram–ը plus size մոդել Դիլյարա Լարինայի` ինտերնետային բոյկոտի նախաձեռնողի շնորհիվ։