ԵՐԵՎԱՆ, 22 օգոստոսի – Sputnik. Հայաստանի բոլոր քաղաքացիները՝ անկախ կուսակցական պատկանելությունից, դավանքից, համոզմունքներից, պետք է անեն ամեն ինչ, որ մեր փոքր երկիրը չհայտնվի անկայունութան, քաոսի, հետագայում` ազգային անվտանգության և անկախության կորստի սպառնալիքների առջև, «Sputnik-Արմենիա» ռադիոկայանի հետ զրույցում ասաց «Ինտեգրացիա և զարգացում» ՀԿ նախագահ, քաղաքական վերլուծաբան Արամ Սաֆարյանը` մեկնաբանելով արևմտյան վերլուծական կենտրոնների հոռետեսական կանխատեսումները՝ կապված հայ-ադրբեջանական հակամարտության սրման հետ:
Այդ կենտրոնների չարագույժ կանխատեսումները կանխելու համար Սաֆարյանը նախ կարևորում է իշխող և ընդդիմադիր բոլոր ուժերի միջև քաղաքական երկխոսության անհրաժեշտությունը:
«Այդ երկխոսությունը պետք է լինի պարզ, թափանցիկ և հասկանալի ամբողջ հասարակության համար: Բոլորը պետք է ինչ-որ բան զիջեն՝ հանուն կայունության և անկախության պահպանման: Երկորդը պետք է լինի հասարակական երկխոսություն»,-ընդգծել է բանախոսը:
Սաֆարյանը վկայակոչում է նաև մեկ այլ կանխատեսում, ըստ որի՝ Հայաստանում կարող են լինել արտաքին և ներքին սրացումներ: Առաջինը՝ հայ-ադրբեջանական զինված հակամարտության բորբոքումն է, որը կարող է տեղի ունենալ բառացիորեն ցանկացած պահի:
«Ադրբեջանը մինչև ատամները զինված է, ադրբեջանական հասարակությունը դաստիարակված է ատելության ոգով, և Ադրբեջանը ձգտում է ռևանշի: Կա նաև երկրորդ կանխատեսումը, որ ուկրաինական սցենարով Հարավային Կովկասում կարող են լինել ներքին հակամարտությունների սրացումներ թե′ Հայաստանում, թե′ Ադրբեջանում: Ադրբեջանի ներքին զարգացումներին չեմ տիրապետում, բայց Հայաստանի մասին կարող եմ ասել հետևյալը` մի շարք պատճառներ, մասնավորապես՝ աճող սոցիալական դժվարությունները, իրապես, կարող են հիմք դառնալ հասարակական անհանգստությունների սրման համար»,-ընդգծել է նա:
Քաղաքական ներքին կայությունը պահելու և արտաքին մարտահրավերներին դիմագրավելու համար Արամ Սաֆարյանն առաջարկում է հետևյալը՝ մամուլը, հեռուստատեսությունը և ռադիոն պետք է դառնան հարթակ ոչ միայն տարաձայնությունների սրման, այլ քաղաքական և հասարակական երկխոսության զարգացման, միմյանց միջև եզրեր գտնելու և պայմանավորվածություններ ձեռք բերելու համար:
«Կարծում եմ` մեր երկիրը, գտնվելով դժվարին աշխարհաքաղաքական շրջապատում և անբարենպաստ արտաքին սպառնալիքների ազդեցության տակ, կկարողանա հաղթահարել և պահպանել իր ներքին քաղաքական կայունությունը»,-ասել է նա:
Այդ անբարենպաստ հարևանության պայմաններում Հայաստանի անվտանգության երաշխավորներից քաղաքական վերլուծաբանը մատնանշում է նաև Հայաստանում տեղակայված ռուսական ռազմաբազան: Ինչ վերաբերում է ռուս-հայկական ռազմավարական դաշինքին և քաղաքական գործակցությանը, ապա Սաֆարյանը վստահ է, որ Հայաստանի Հանրապետության ճնշող մեծամասնությունն դրական է վերաբերվում այդ գործակցությանը:
Արամ Սաֆարյանը կարևորում է Հայաստանում քաղաքական և հասարակական երկխոսությունը
© Sputnik / Asatur Yesayants
Բաժանորդագրվել
Սաֆարյանն առաջարկում է, որ մամուլը, հեռուստատեսությունը և ռադիոն դառնան հարթակ ոչ միայն տարաձայնությունների սրման, այլ քաղաքական և հասարակական երկխոսության համար
