ԵՐԵՎԱՆ, 21 օգոստոսի– Sputnik. ԵՏՄ երկրների էկոնոմիկայի նախարարներն ու ազգային բանկերի ղեկավարները նախատեսում են շուտով խորհրդակցություն կազմակերպել, որը նվիրված է համակարգված դրամավարկային և բյուջետային քաղաքականության մշակմանը, տեղեկացրել է Բելառուսի առաջին փոխվարչապետ Վասիլի Մատյուշևսկին։
«Տեսնում ենք, որ վերջերս շատ են արտաքին և ներքին ցնցումները, այդ պատճառով ԵՏՄ–ի շրջանակում դրամավարկային և բյուջետային քաղաքականության համակարգման հարցը շատ կարևոր է», – Բելառուսի կառավարության մամուլի ծառայությունը մեջբերում է Մատյուշևսկու խոսքերը` ամփոփելով ԵՏՀ խորհրդի նիստի արդյունքները, որի ընթացքում քննարկվել են ինտեգրացիայի, մակրոտնտեսության, առևտրի, տնտեսության, տեխնիկական կարգավորման և էներգետիկ ոլորտներին վերաբերող հարցեր։
Նա տեղեկացրել է, որ խորհրդի նիստին սկզբունքային պայմանավորվածություն է ձեռք բերվել առաջիկայում անցկացնել ԵՏՄ մասնակից երկրների էկոնոմիկայի նախարարների և ազգային բանկերի ղեկավարների խորհրդակցություն, որը նվիրված կլինի համակարգված դրամավարկային և բյուջետային քաղաքականության մշակմանը։
Հինգշաբթի Ղազախստանը սկսել է իրականացնել նոր դրամավարկային քաղաքականություն, որը հիմնված է տենգեի ազատ լողացող փոխարժեքի վրա և չեղյալ է հայտարարել արժութային միջանցքը, ինչն ազդել է երկրի արժութային շուկայի և ԵՏՄ մի շարք մասնակիցների ազգային արժույթների վրա։
Նիստում քննարկված այլ հարցերի թվում փոխվարչապետը նշել է ԵՏՄ–ի կազմում նոր անդամներ ներառելու կարգը, ազատ առևտրի գոտու ստեղծման շուրջ Իրանի հետ բանակցություններ սկսելու մասին որոշման նախագիծն ու հետազոտական խմբի ստեղծումը, որը կզբաղվի ԵՏՄ–ի և Իրանի միջև ազատ առևտրի գոտու մասին համաձայնագրի կնքման նպատակահարմարության հարցի մշակմամբ։
Բացի այդ, խորհրդի անդամները որոշել են ստեղծել աշխատանքային խումբ, որը կզբաղվի ԵՏՄ–ի իրավապայմանագրային բազայում ԱՀԿ–ի առաջ Ղազախստանի ստանձնած պարտավորությունների կատարմամբ։
ԵՏՄ երկրների Կենտրոնական բանկերը կհամակարգեն դրամավարկային քաղաքականությունը
© Sputnik
Բաժանորդագրվել
ԵՏՀ–ի խորհրդի նիստի ժամանակ պայմանավորվածություն է ձեռք բերվել ԵՏՄ անդամ երկրների էկոնոմիկայի նախարարների և ազգային բանկերի ղեկավարների խորհրդակցություն կազմակերպելու շուրջ, որը նվիրված է համակարգված բյուջետային քաղաքականությանը
