Արոնյանն ու ևս երեք հայ շախմատիստներ կմեկնեն Բաքու և կմասնակցեն Աշխարհի գավաթի խաղերին

ԵՐԵՎԱՆ, 21 օգոստոսի – Sputnik. Չորս հայ շախմատիստներ` Լևոն Արոնյանը, Գաբրիել Սարգսյանը, Հրանտ Մելքումյանն ու Սամվել Տեր–Սահակյանը, աշնանը Բաքվում կմասնակցեն շախմատի աշխարհի գավաթի խաղերին։

Ինչպես տեղեկացնում է ՖԻԴԵ–ի կայքը, վիճակահանության արդյունքում որոշվել են առաջնության մեկնարկային խաղի մասնակիցների հակառակորդները։

Լևոն Արոնյանը կմրցի Լյուքսեմբուրգի ներկայացուցիչ Մայքլ Վեդենկելերի հետ: Սամվել Տեր-Սահակյանի մրցակիցը կլինի Նիկիտա Վիտիուգովը (Ռուսաստան): Գաբրիել Սարգսյանը կխաղա լեհ Մաթեուս Բարտելի հետ, Հրանտ Մելքումյանը` ամերիկացի Գատա Կամսկու հետ: 

Շախմատի աշխարհի գավաթն անցկացվելու է Բաքվում սեպտեմբերի 10-ից հոկտեմբերի 4-ը։ Առաջնությանը կմասնակցեն 128 շախմատիստներ` նոկաուտ համակարգով։ Մրցանակային ֆոնդը կազմում է 1.6 մլն դոլար։

2015 թվականի Աշխարհի գավաթի հաղթողները Հավակնորդների մրցաշարին մասնակցելու իրավունք կստանան։

Կանոնակարգի համաձայն` յուրաքանչյուր պարտիայի առաջին 40 քայլերի համար մասնակիցներին տրվելու է 90 րոպե ժամանակ և ևս 30 րոպե` մինչև պարտիայի ավարտը` յուրաքանչյուր քայլի համար ավելացնելով 30 վայրկյան։

Եթե երկու խաղերից հետո գրանցվի ոչ ոքի, հակառակորդները կխաղան երկու պարտիա 25+10 վերահսկմամբ։ Եթե կրկին ոչ ոքի լինի, երկու պարտիա` 10+10, այնուհետև երկու պարտիա` 5+3։ Եթե նաև դրանից հետո հակառակորդները խաղան ոչ–ոքի, ապա նախատեսված է «արմագեդոն» (5-ը 4-ի)+3, ոչ–ոքի սևերի օգտին։