Փորձագետ. ՌԴ–ում հայ միգրանտների քանակը կրճատվում է

ԵՐԵՎԱՆ, 21 օգոստոսի – Sputnik. Վերջին երեք տարիների ընթացքում Ռուսաստանում աշխատող Հայաստանի քաղաքացիների թիվը պահպանվում է 500 հազարի սահմանում, Մոսկվայում անցկացված «Ապօրինի միգրացիա. չսերտած դասեր Եվրոպայի համար» խորագրով ասուլիսի ժամանակ ասել է միգրացիայի հարցերով փորձագետ Ալեքսանդր Կալինինը։

Ինչպես հայտնել է Կալինինը, Ռուսաստանի ԴՄԾ–ի տվյալով, 2012 թվականին հայ միգրանտների թիվը հասել է 514.5 հազարի։

«Հայ միգրանտների քանակի նվազումը կապված է քաղաքացիության դյուրացված ընթացակարգի հետ, որը պայմանավորված է այն փաստով, որ Հայաստանը 2015 թվականի հունվարի 1-ից անդամակցում է ԵՏՄ–ին», – ասել է նա` պատասխանելով «Sputnik–Արմենիա» պորտալի հարցին։

Կալինինը նշել է նաև, որ Հայաստանից Ռուսաստան տեղափոխվող միգրանտները սովորաբար զբաղվում են առևտրով, սակայն վերջին տարիներին նրանք ամրապնդել են իրենց դիրքերը նաև այլ բնագավառներում, մասնավորապես` կրթության և ձեռնարկատիրության ոլորտներում։

Ուզբեկստանի հարցին պատասխանելով` փորձագետը պնդել է, որ միգրանտների հոսքի անկման պատճառը ռուբլու փոխարժեքի տատանումներն էին, «հնարավոր է, պատճառներից մեկը նաև վերահսկման խստացումն է»։

«Այդ հարցին պետք է պատասխանել ոչ միայն ռուբլու արժույթի, այլ մի քանի գործոնների համատեքստում։ Առաջին հերթին, շատ միգրանտներ մի շարք հանգամանքների պատճառով, օրինակ, ՌԴ մուտք գործելու օրենքի խստացման պատճառով մեկնել են հայրենիք։ Երկրորդը` շատ միգրանտներ սխալմամբ կարծել են, որ «այստեղ այլևս հնարավոր չի լինի աշխատել»։ Պարզվեց, որ ոչ, հնարավոր է և պետք է։ Սակայն պետք է հաշվի առնել ՌԴ օրենսդրությունը», – ասել է նա։

Ղազախստանի հարցին փորձագետը պատասխանել է, որ Հայաստանի, Ղազախստանի և Ղրղըզստանի քաղաքացիների փաստաթղթերի ձևակերպման համար «միասնական պատուհան» ստեղծելու իմաստ չի գտնում։ «Դա բյուջետային միջոցների ավելորդ վատնում է», – ասաց նա։

«Չեմ կարծում, որ Եվրոպայի և ԵՏՄ երկրների միգրանտների միջև մրցակցություն կարող է լինել»,– նշել է Կալինինը և ավելացրել, որ եվրոպացի միգրանտների ալիքից զգուշանալ չարժե։

«Եթե դուք ուշադիր հետևեք Ռուսաստանի միգրացիոն քաղաքականությանը, ապա կտեսնեք, որ այն «հարմարեցված է» ԱՊՀ երկրների միգրանտների համար նաև բալային համակարգով, ինչը այժմ քննարկում են, և աշխատանքային գործունեություն օրինականացնելու առումով։ Եվ դա շատ ճիշտ է։ Միգրանտներն ԵՏՄ երկրներից պաշտպանված կլինեն Ռուսաստանի օրենքով, ինչը նշանակում է, նաև` պետական մակարդակով», – ընդգծել է նա։