Հարավային Կորեան սպառնում է պատասխանել ԿԺԴՀ–ի նոր սադրանքներին

ԵՐԵՎԱՆ, 21 օգոստոսի – Sputnik. Հարավային Կորեայի պաշտպանության նախարար Խան Մին Գուն խոստանում է դաժան հակահարված տալ նոր սադրանքներին, հայտնում է Ռյոնհապ գործակալությունը։

«Եթե Հյուսիսային Կորեան նոր սադրանքների դիմի, ապա մեր բանակը պատասխան կտա և կստիպի նրանց վճարել դրա համար», – ասվում է պաշտպանական գերատեսչության ղեկավարի հայտարարության մեջ։

Նախարարը նաև մեկնաբանել է Սեուլի որոշումը, որի համաձայն չպետք է դադարեցվի բարձրախոսների աշխատանքը հյուսիսային սահմանում։ «Բարձրախոսների հեռարձակումը ԿԺԴՀ–ի ռումբային սադրանքներին պատասխանելու պատշաճ միջոցն է», – նշել է Խան Մին Գուն։

Հարավային Կորեան հայտարարել է, որ հինգշաբթի ԿԺԴՀ–ն ռմբակոծություն է իրականացրել ապառազմականացված գոտում։ Փհենյանն իր հերթին մեղադրել է Սեուլին, որ հենց Հարավային Կորեան է առանց պատճառի տասնյակ հրետանային համազարկեր իրականացրել ԿԺԴՀ–ի տարածքում։

Ընդ որում, հյուսիսկորեական զինվորականները նախազգուշացրել էին, որ եթե Հարավը մինչև օգոստոսի 22-ը չդադարեցնի բարձրախոսի հեռարձակումը, ԿԺԴՀ–ն կվերացնի դրանք ռազմական գործողությունների ընթացքում։ Սեուլում դրան ի պատասխան սպառնացել են հաշվեհարդար տեսնել և հայտարարել են, որ չեն դադարեցնի այդ սարքավորումների աշխատանքները, որոնք հեռարձակում են Հարավային Կորեայի նորությունները և քարոզչական բնույթի հաղորդագրությունները։