ԵՐԵՎԱՆ, 21 օգոստոսի – Sputnik. Հայաստանում որևէ հարցում 95 տոկոս համաձայնություն ունենալն աննախադեպ երևույթ է, նման ցուցանիշ ոչ մի հարցում չենք ունեցել, «Sputnik-Արմենիա» ռադիոկայանի հետ զրույցում ասաց քաղաքական վերլուծաբան Մովսես Դեմիրճյանը՝ մեկնաբանելով Gallup International-ի անցկացրած հարցումները։
Gallup International-ի հարցման արդյունքների՝ հարցվածների 95 տոկոսը դրական է գնահատել էլեկտրաէներգիայի թանկացման դեմ` Բաղրամյան պողոտայում անցկացված շարժումը:
Բանախոսը սա պայմանավորում է շարժման սոցիալական նշանակությամբ, այսինքն՝ հոսանքի թանկացումը բացասաբար է ազդում բոլորի ֆինանսական վիճակի վրա:
«Էլեկտրաէներգիա թանկացումն այն հարցն էր, որն առնչվում է բոլորին` թե՛ իրավաբանական, թե՛ ֆիզիկական անձանց: Բոլորը շատ լավ հասկանում են, որ սակագնի բարձրացումն իր ետևից բերելու է ծառայությունների և ապրանքների թանկացում, ուստի բնական է, որ մարդիկ նման գնահատական են տվել»,-նշել է նա:
Հանրային տրամադրությունների փոփոխություն, ըստ էության, Հայաստանում արդեն տեղի է ունեցել, և ինչպես նկատում է վերլուծաբանը, այդ տրամադրություններ արտահայտողներն արդեն ոչ թե կուսակցություններն են, այլ քաղաքացիական շարժումները:
«Այստեղ կա մի քանի հետաքրքիր բան. նախ` քաղաքացիական շարժումները բավական երիտասարդ են, ոչ թե այն իմաստով, որ նոր են առաջացել, այլ որ դրանց անդամները երիտասարդ են, անկուսակցական, քաղաքականությունից հեռու, անկախության տարիներին ծնված: Դժվար է լինելու կոււսակցություններին ետ ստանալ հանրային տրամադրություններն արտահայտողի դերը, իսկ փոփոխությունը, որը տեղի է ունեցել Հայաստանում, շատ առողջ, դրական միտում է»,-ընդգծել է բանախոսը:
Քաղաքական վերլուծաբանը նկատում է, որ քաղաքացիական նախաձեռնությունները չեն կարող դառնալ պայթյունավտանգ և քաոսային, իրականում, ըստ նրա, դրանք քաոսը կարգավորող համակարգեր են:
«Քաոսը ոչ թե քաղաքացիական կառույցների մակարդակում է, այլ հանրային տրամադրությունների: Նրանք այդ քաոսին արտահայտվելու ձև են տալիս, թույլ չեն տալիս, որ քաոսը կուտակվի, արտահայտվում են»,- համոզված է Մովսես Դեմիրճյանը:
Վերլուծաբան. Բաղրամյան պողոտայի ակցիայի վերաբերյալ 95 տոկոս համաձայնությունն աննախադեպ է
17:22 21.08.2015 (Թարմացված է: 17:28 21.08.2015)
Բաժանորդագրվել
Վերլուծաբանը դա պայմանավորում է շարժման սոցիալական նշանակությամբ, այսինքն՝ հոսանքի թանկացումը բացասաբար է ազդում բոլորի ֆինանսական վիճակի վրա
