Հունաստանի վարչապետ Ցիպրասը հրաժարական է տվել և հայտարարել վաղաժամ ընտրությունների մասին

ԵՐԵՎԱՆ, 20 օգոստոսի– Sputnik. Հունաստանի վարչապետ Ալեքսիս Ցիպրասը հայտարարել է, որ հեռանում է պաշտոնից, նա հայտարարել է նաև վաղաժամ խորհրդարանական ընտրությունների անցկացման մասին, որոնց ավարտից առաջ Հունաստանի կառավարությունը, ըստ Սահմանադրության, կգլխավորի Գերագույն դատարանի նախագահ Վասիլիկի Տանու–Խրիստոֆիլուն։ Այսպիսով, առաջին անգամ կառավարության ղեկավարի պաշտոնը ժամանակավոր կին կզբաղեցնի։

Ցիպրասը չի նշել ընտրությունների ամսաթիվը, սակայն ենթադրվում է, որ դրանք կանցկացվեն սեպտեմբերի 20–ին։

Ցիպրասը գլխավորել է Հունաստանի կառավարությունը յոթ ամիս առաջ 2015 թ.–ի հունվարի 25–ին կայացած վաղաժամ խորհրդարանական ընտրությունների ժամանակ «ՍԻՐԻԶԱ» արմատական ձախակողմյան կոալիցիայի հաղթանակից հետո։

«Հունաստանի նախագահին իմ և կառավարությանը հրաժարականի մասին դիմում եմ ներկայացրել», – հայտարարել է Ցիպրասը ժողովրդին ուղղված ուղերձում, որը հեռարձակել են հունական հեռուստաալիքները։

Նրա խոսքով` ժողովուրդը պետք է որոշի, թե ով է բանակցություններ վարելու պետական պարտքի մարման շուրջ, ով պետք է արմատական բարեփոխումներ իրականացնի։

«Ճնշումը, շանտաժը, ֆինանսական վիճակի վատացումն ու վերջնագրերը հանգեցրեցին Հունաստանի համար աննախադեպ իրավիճակի։ Հասարակությունն ուզում է, որպեսզի ամեն ինչ փոխվի։ Մենք չհասանք մեր բոլոր նպատակներին կամ համաձայնություններին։ Սակայն հասանք հնարավորինս լավ համաձայնությունների։ Այդ պայմանագիրը պետք է պահպանվի», – հայտարարել է Ցիպրասը։

Նրա խոսքով` կաբինետը ցանկանում է ստանալ ժողովրդի հստակ մանդատն ու կայուն կառավարություն։

«Ձեր ձայնով մենք ուզում ենք որոշել, թե ով և ինչպես կարող է տանել Հունաստանին դժվարին, սակայն հուսադրող ճանապարհով», – ասել է Ցիպրասը։