Լեհաստանի բնակիչները հայտարարել են ոսկով բեռնված նացիստական գնացք գտնելու մասին

ԵՐԵՎԱՆ, 20 օգոստոսի– Sputnik. Լեհաստանի երկու բնակիչներ հայտարարել են, որ գտել են նացիստական գնացք, որը, լուրերի համաձայն, լի է ոսկով, թանկարժեք քարերով և զենքով։ Այդ մասին հաղորդում է vokrugsveta.ru կայքը` հղում անելով BBC News–ին և լեհական ԶԼՄ–ներին:

Ենթադրվում է, որ գնացքը կորել է Երկրորդ համաշխարհային պատերազմի ժամանակ։ Համարվում է, որ այն անհայտ կորել է ներկայիս Վրոցլավ քաղաքից ոչ հեռու 1945թ.–ին, երբ քաղաքին մոտեցել են խորհրդային զորքերը։

Ինչպես հաղորդել են լեհական իրավաբանական ընկերությունում, իրենց են դիմել մեկ լեհ և մեկ գերմանացի քաղաքացիներ, որոնք պնդել են, որ գտել են գնացքը։ Տեղի ԶԼՄ–ների տվյալների համաձայն` նրանք ցանկանում են ստանալ գնացքի պարունակության 10 տոկոսը։

Լեհական կայքերը հիշեցնում են, որ Քսենժ ամրոցի մոտ պատերազմի ժամանակ կորած ոսկով և թանկարժեք քարերով լի գնացքի թեման տարածված է տեղի բնակչության բանահյության մեջ։ Միաժամանակ աղբյուրները ներկայացնում են դետալներ` կապված գտածոյի հետ։ Այսպես, տարբեր լրատվական կայքերում կարելի է հանդիպել հետևյալ տեղեկատվությանը. գնացքի երկարությունը կազմում է 150 մետր, իսկ ոսկու քաշը կազմում է 300 տոննա։

Միաժամանակ Վալբժիխում, որը գտնվում է Քսենժ ամրոցից երեք կմ հեռավորության վրա, գնացքը գտնելու մասին գործի քննության համար ձևավորվել է հատուկ հանձնաժողով, որը գլխավորել է քաղաքապետը։ Վալբժիխի շրջանային խորհրդի ներկայացուցիչ Մարիկա Տոկարսկայի խոսքով` գտածոյի վայրում աշխատում են իրավաբաններ, զինվորականներ և ոստիկանություն։ Ինչպես նշում է Տոկարսկան, ավելի վաղ նշված տարածքը չի ուսումնասիրվել, ուստի անհայտ է, թե այնտեղ ինչ կարելի է գտնել։ Անհետացած գնացքը գտնելու նախորդ փորձերը հաջողությամբ չեն պսակվել։