Գնաճը Հայաստանում հունիսին կազմել է 5.5 %` ԵՏՄ–ում 13,6 % գների աճի դեպքում

ԵՐԵՎԱՆ, 20 օգոստոսի– Sputnik. Հայաստանում 2015թ.–ի հունիսին սպառողական գները, 2014թ.–ի հունիսի համեմատ, աճել են 5,5 տոկոսով` Եվրասիական տնտեսական միության անդամ երկրներում 13,6 տոկոս գնաճի դեպքում, հաղորդվում է Եվասիական տնտեսական հանձնաժողովի (ԵՏՀ) կայքում։

Հայաստանի ազգային վիճակագրական ծառայության տվյալներով` Հայաստանում 2015թ.–ի հունիսին 12–ամսյա գնաճը կազմել է 5,5 տոկոս` հասնելով 4%+-1,5 թույլատրելի դիապազոնի վերին սահմանին։ Միաժամանակ Հայաստանում հունիսին սպառողական գներն անցած ամսվա համեմատ նվազել են 1,4 տոկոսով։

ԵՏՀ տվյալների համաձայն` 2015թ.–ի հունիսին ԵՏՄ սպառողական գները, 2014թ.–ի հունիսի համեմատ, աճել են 13,6 տոկոսով, իսկ մեկ ամսում միությունում գների և սակագների աճը կազմել է 0,1 տոկոս։

Ընթացիկ տարվա հունիսին ԵՏՄ երկրների շարքում 12–ամսյա գնաճի ամենաբարձր ցուցանիշը գրանցվել է Ռուսաստանում`15,3 տոկոսի մակարդակում։ Ընդ որում, Ռուսաստանում սպառողական գները մեկ ամսում աճել են 0,2 տոկոսով։ Բելառուսում սպառողական գները հունիսի տվյալներով աճել են 13,2 տոկոսով, հաշվետու շրջանում` 0,7 տոկոսով։

Ղազախստանում սպառողական գներն ընթացիկ տարվա հունիսին, անցած տարվա հունիսի համեմատ, ավելացել են 3,9 տոկոսով, իսկ մեկ ամսում նվազել են 0,1 տոկոսով։

Ղրղըզստանում գնաճը հաշվետու շրջանում կազմել է 4,5 տոկոս, անցած ամսվա համեմատ գները նվազել են 0,9 տոկոսով։

«2015թ.–ի հունիսին, 2014թ.–ի դեկտեմբերի համեմատ, Հայաստանում և Ղրղըզստանում արագ տեմպերով աճել են ոչ պարենային ապրանքների գները (համապատասխանաբար` 4,1 և 4,3 տոկոսով), Բելառուսում և Ղազախստանում` վճարովի ծառայությունների գները (համապատասխանաբար` 10,5 և 2,1 տոկոս), Ռուսաստանում` պարենային ապրանքների գները (10,8 տոկոս)»,– նշվում է հաղորդագրությունում։

ԵՏՄ–ն տնտեսական միություն է, որը ստեղծվել է Մաքսային միության հիման վրա եվրասիական ինտեգրացման շրջանակում 2015թ.–ի հունվարի 1–ին։ Միությունը ենթադրում է ԵՏՄ երկրների միջև ապրանքների, ծառայությունների, կապիտալների և աշխատանքային ռեսուրների ազատ տեղափոխություն։