ԵՐԵՎԱՆ, 20 օգոստոսի– Sputnik. Վերջին երկու ամսում Երևանի մի քանի տներ հայտնվեցին ոչ միայն բնակիչների և անցորդների, այլ նաև լուսանկարիչների և հեռուստատեսության օպերատորների ուշադրության կենտրոնում։
Երիտասարդ նկարիչ Ռոբերտ Պողոսյանն այդ տների պատերը զարդարել է մեծ ճանաչում վայելող դերասանների, ռազմական գործիչների և բանաստեղծների հսկայական դիմանկարներով։ Նկարիչը «Sputnik-Արմենիա» տեղեկատվական պորտալին պատմել է, թե ինչպես և ինչու է ծագել այդ գաղափարը ու ինչպես է նա կյանքի կոչում այն։
Ռոբերտ Նիկողոսյանը 21 տարեկան է, անցած տարի ավարտել է Երևանի գեղարվեստի պետական ակադեմիան, թեպետ մասնագիտությամբ չի աշխատում։ Ռոբերտը խաղասրահում համակարգող է։
«Գրաֆիտի նկարելու գաղափարը հանկարծակի հայտնվեց, քանի որ ուզում էի մեծ դիմանկարներ նկարել։ Եվ ես միանգամից որոշեցի դրանով զբաղվել», – ասաց Նիկողոսյանը։
Նա նաև նշեց, որ մեկ դիմանկարի վրա աշխատանքը տևում է 2–3 ժամ։
Սփրեյ–ներկերով նկարված նրա ստեղծագործությունների թվում են բանաստեղծներ Եղիշե Չարենցի, Պարույր Սևակի, շանսոնյե Շառլ Ազնավուրի, Հայաստանի ազգային հերոս և Արցախի հերոս Մոնթե Մելքոնյանի դիմանկարները։ Ռոբերտը նաև ստեղծել է Սոս Սարգսյանի և Ֆրունզիկ Մկրտչյանի երկուական դիմանկար։
«Շատ եմ սիրում Ֆրունզիկ Մկրտչյանին և նրան մեծ հայ եմ համարում։ Բեմում նրան չեմ տեսել, նկարել եմ լուսանկարներով և ֆիլմերով», – ասաց Նիկողոսյանը
