ԵՐԵՎԱՆ, 20 օգոստոսի– Sputnik. ԱՄՆ–ի Ֆլորիդա նահանգում գանձեր որոնողները իսպանական գալեոնների խորտակման վայրում գտել են 4,5 մլն դոլարի ոսկե մետաղադրամներ, հաղորդում է Florida Today լրատվական պորտալը։
Բրենթ Բրիսբենը (Brent Brisben) և նրա վարձած թիմը ոսկե մետաղադրամները գտել են հուլիսի 30–ին, սակայն Բրիսբենն այդ գտածոյի մասին տեղեկացրել է միայն օգոստոսի 19–ին։ Բրիսբենն այն տարածքի սեփականետերն է, որտեղ գտել են գանձը։
Capitana նավի անդամները երկու օրում (հուլիսի 30 և 31) Ատլանտյան օվկիանոսի հատակից բարձրացրել են 350 ոսկե մետաղադրամներ, որոնցից ինը բացառիկ են, քանի որ ձուլվել են հատուկ Իսպանիայի թագավոր Ֆիլիպ V–ի համար։
Այս պահին այդ մետաղադրամներից յուրաքանչյուրի արժեքը կազմում է մոտ 300 հազար դոլար։
Գանձը գտնվել է ափից ոչ հեռու, ոչ շատ խորը տարածքում։ Գտածոն նաև հատուկ նշանակություն ունի այն պատճառով, որ այն գտնվել է իսպանական նավատորմի խորտակման 300–րդ տարելիցի տարում։
Հայտնաբերված ոսկին, ամենայն հավանականությամբ, գտնվել է 1715թ.–ի հուլիսի 24–ին Հավանայից Իսպանիա մեկնող 11 գալեոններից մեկում։ Մեկ շաբաթ հետո մոլեգնած փոթորիկի հետևանքով նավերը խորտակվել են, ավելի քան հազար մարդ է մահացել։
Նավերում եղել են թանկարժեք իրեր, որոնց ընդհանուր արժեքը մեր օրերում կազմում է մոտ 400 մլն դոլար։
Բրիսբենի գտածոյից երկու օր առաջ Ֆլորիդա նահանգում բնակվող գանձեր որոնողների ընտանիքը Բրիսբենի տարածքում 1 մլն դոլարի ոսկի էր գտել։
Ատլանտյան օվկիանոսում 4,5 մլն դոլարի ոսկի են գտել
© Sputnik / Роман Денисов
/ Բաժանորդագրվել
Դայվերներն Ատլանտյան օվկիանոսի հատակից բարձրացրել են 350 ոսկե մետաղադրամներ, որոնցից յուրաքանչյուրի արժեքն այս պահին կազմում է մոտ 300 հազար դոլար
