ԵՐԵՎԱՆ, 20 օգոստոսի– Sputnik. Ռուսաստան–Արևմուտք դիմակայության կենտրոնը կարող է Ուկրաինայից տեղափոխվել Կովկաս` Վրաստան, Հայաստան և Ադրբեջան, կարծում են Stratfor մասնավոր ամերիկյան հետախուզական–վերլուծական ընկերության փորձագետները։
Ուկրաինական հակամարտության սրմանը զուգահեռ ուժեղանում է նաև Ռուսաստան–Արևմուտք դիմակայությունը։
Ուսումնասիրության հեղինակները գրում են, որ 2008թ.–ին վրաց–օսեթական ռազմական հակամարտությունից հետո Ռուսաստանն ամրապնդեց իր ռազմական ներկայությունը Հայաստանում և ուժեղ տնտեսական և քաղաքական դիրքեր հաստատեց այնտեղ։ Միաժամանակ Հայաստանում, Աբխազիայում և Հարավային Օսեթիայում ռազմական ներկայությունը, ինչպես նաև Ադրբեջանի հետ անվտանգության ոլորտում իրականացվող համագործակցությունը Ռուսաստանին գերիշխող արտաքին ուժի դիրք են ապահովում տարածաշրջանում, կարծում են վերլուծաբանները։
«Այդուհանդերձ, Արևմուտքը մտադիր չէ թույլատրել, որպեսզի ընդլայնվի Ռուսաստանի ազդեցությունը հետխորհրդային տարածքում։ Ուկրաինայում տեղի ունեցած ապստամբության ժամանակ ԱՄՆ–ն և ԵՄ–ն աջակցեցին Կիևում ռուսամետ կառավարության տապալմանը` հօգուտ արևմտամետ ուժերի։ Եվ արևմտյան երկրները հստակ ակնարկեցին, որ նրանց աջակցությունը չի սահմանափակվի Ուկրաինայով։ Արևմուտքը սկսեց ռազմակայաններ կառուցել Կենտրոնական և Արևելյան Եվրոպայում, ինչպես նաև ընդլայնել անվտանգության ոլորտի համագործակցությունը հետխորհրդային մի քանի երկրների հետ», – նշվում է հոդվածում։
Ինչպես նշում են վերլուծաբանները, Ռուսաստան–Արևմուտք դիմակայության նոր կետ կարող է դառնալ հենց Կովկասը։ Այս մասին վկայում է օգոստոսի վերջին Վրաստանում նախատեսված ՆԱՏՕ–ի ուսումնական կենտրոնի բացումը։
Ըստ փորձագետների, Ուկրաինայում գրանցված ճգնաժամից հետո, երկու տասնամյակ տևած հարաբերականորեն հանգիստ զարգացումից հետո, անսպասելիորեն սկսեց սրվել Ադրբեջանի և Հայաստանի հակամարտությունը Լեռնային Ղարաբաղի շուրջ։
Ռուսաստանն այս հարցում զուսպ դիվանագիտական դիրքորոշում ունի, նշում են հոդվածի հեղինակները։ Մոսկվան երկու կողմերին երկխոսության կոչ է անում, ինչպես նաև, որպես զսպման մասնիկ, շարունակում է երկու երկրներին ռազմամթերք մատակարարել։
Stratfor. Ռուսաստան–Արևմուտք դիմակայությանը կարող է ներգրավվել նաև Կովկասը
11:30 20.08.2015 (Թարմացված է: 16:18 03.06.2016)
© Sputnik / Олег Ласточкин
/ Բաժանորդագրվել
Արևմուտքի երկրները շարունակում են ամեն ինչ անել, որ խոչընդոտեն Ռուսաստանի` հետխորհրդային տարածքի վրա ունեցած ազդեցության աճին։ Ինչպես նշում են վերլուծական կենտրոնի փորձագետները, Ուկրաինայից հետո հակամարտության նոր գոտի կարող է դառնալ Կովկասը
