Թուրքագետ. Թուրքիայի ընդդիմադիր կուսակցություններն իրականում հակաիշխանական կոշտ դիրքորոշում չունեն

ԵՐԵՎԱՆ, 19 օգոստոսի– Sputnik. Թուրքիայում բավական անկայուն իրավիճակ է և ներքաղաքական, և արտաքին քաղաքականության ասպարեզներում, «Sputnik-Արմենիա» ռադիոկայանին ասել է տարածաշրջանային փորձագետ, թուրքագետ Մուշեղ Խուդավերդյանը,

Նրա կարծիքով, արտաքին քաղաքական լարվածությունը հիմնականում պայմանավորված է թուրք-քրդական հակամարտության սրմամբ, երկրում պարբերաբար տեղի ունեցող ահաբեկչություններով։

«Իսլամական պետություն» խմբավորման հետ բարդ հարաբերություններով: Ներքաղաքական ասպարեզում իրավիճակը ևս լարված է, քանի որ, ինչպես հիշեցնում է թուրքագետը, անհամաձայնություն կա իշխող «Արդարություն և զարգացում» կուսակցության և թուրքական խորհրդարան անցած մյուս կուսակցությունների միջև՝ կոալիցիոն կառավարություն ձևավորելու շուրջ:  «Սակայն կարող ենք ասել, որ ինչքան էլ լարված մթնոլորտ լինի Թուրքիայի իշխող կուսակցության և խորհրդարան անցած կուսակցությունների միջև, ամեն դեպքում, թուրքական կուսակցությունները չունեն հակաիշխանական կոշտ դիրքորոշում:  Շատ դեպքերում, նրանք նույնիսկ հրաժարվում են հակաիշխանական նախկին հայտարարություններից»,- ասել է նա:

Թուրքագետն այս համատեքստում օրինակ է բերում քրդական Ժողովուրդների դեմոկրատական կուսակցության առաջնորդ Սելահաթթի Դեմիրթաշի՝ Հայոց ցեղասպանության մասին տարիներ առաջ արված հայտարարությունը, որում նա ընդունել էր, որ 1915 թվականի դեպքերը՝ ցեղասպանություն էր: Մինչդեռ վերջերս նա հայտարարել է, թե չի եղել ցեղասպանություն, և այդ հարցի պարզաբանման համար անհրաժեշտ է ստեղծել պատմաբանների հանձնաժողով:
 
«Այսինքն ամրագրվեց թուրքական իշխանության հակահայկական թեզը, ինչը միանշանակ կարող է վկայել, որ չնայած թուրքական մեջլիս անցած կուսակցությունները որդեգրել են բավական կոշտ ընդդիմադիր կեցվածք, սակայն, իրականում, այդ կուսակցությունների շատ անդամներ վատ հարաբերությունների մեջ չեն իշխող կուսակցությունների հետ: Շատ կուսակցությունների ընդդիմադիր կեցվածքը պայմանավորված է նրանով, որպեսզի հսկողության տակ լինեն իրական ընդդիմադիր ուժերը, որոնք կարող են իրական վտանգ ներկայացնել իշխող կուսակցության համար»,-ընդգծել է Խուդավերդյանը: