ԵՏՄ–ում արդյունաբերությունն աճել է Հայաստանում, Ղազախստանում և Ղրղըզստանում

ԵՐԵՎԱՆ, 19 օգոստոսի– Sputnik. ԵՏՄ–ն անդամ երկրների շարքում ընթացիկ տարվա առաջին կիսամյակում արդյունաբերական արտադրության աճ գրանցվել է Հայաստանում, Ղազախստանում և Ղրղըզստանում։ Այդ մասին վկայում են Եվրասիական տնտեսական հանձնաժողովի (ԵՏՄ) տվյալները։

ԵՏՀ տվյալներով` արդյունաբերական արտադրության ծավալի աճով ԵՏՄ երկրների շարքում առաջին կիսամյակում առաջատար է Ղրղըզստանը, որի արդյունաբերական արտադրության ծավալը հաշվետու շրջանում աճել է 23,6 տոկոսով` կազմելով 469,2 մլն դոլար։

Հունվար–հունիսին արդյունաբերական արտադրության ոչ մեծ աճ է գրանցվել Հայաստանում` 5,1 տոկոս` մինչև 286,8 մլն դրամ։

Ղազախստանի արդյունաբերական արտադրությունը վեց ամիսներին աճել է 0,6 տոկոսով` մինչև 36 796 մլն դոլար։

Միաժամանակ Ռուսաստանում արդոյւնաբերական արտադրությունը հաշվետու շրջանում նվազել է 2,7 մլն դոլարով` մինչև 400 969 մլն դոլար։

Բելառուսի արդյունաբերական արտադրությունը կազմել է 23 896 մլն դոլար` առաջին կիսամյակում նվազելով 7,4 տոկոսով։

ԵՏՄ–ն անդամ երկրների արդյունաբերական արտադրության ծավալը 2015թ.–ի հունվար–հունիսին կազմել է 464,4 մլրդ դոլար` նվազելով 2,6 տոկոսով 2014թ.–ի հունվար–հունիսի համեմատ։