Ոստիկանների պարապմունքների ընթացքում տարհանման, ավտոմեքենայի կանգնեցման և փաստաթղթերի ստուգման վարժանքներ են անցկացվել։
«Մենք բոլորս ցանկանում ենք ունենալ այնպիսի նորմեր, այնպիսի ավանդույթներ, որոնք ունեն ամենաժամանակակից երկրները։ Մեզ մոտ ավելի լավ կլինի։ Քանի որ ես լիովին համոզված եմ, որ մեր ոստիկանությանն ավելի շատ կսիրեն, քան ամերիկյան ոստիկանությանը», – հայտնել է Օդեսայի նահանգապետ Միխայիլ Սահակաշվիլին։
Վրաստանի նախկին նախագահը փորձել է ինքն էլ մասնակցել վարժանքներին, «տուժածին» տեղափոխելու համար Վրաստանի նախկին նախագահը արագ դուրս է եկել պարեկային ավտոմեքենայից, բարձրացրել է գետնին պառկած «վիրավոր» ոստիկանին, տարել նրան դեպի մեքենա և նրա հետ տեղավորվել մեքենայի բեռնախցիկում։
Այս իրադարձությունը սոցցանցերում բազմաթիվ հեգնական մեկնաբանությունների պատճառ է դարձել։
«Ուզում էր, որ լավ լիներ, բայց եղավ այնպես, ինչպես միշտ», «Սահակաշվիլին Ուկրաինայի ոստիկանության հետ մարզվել է, քանի որ հնարավոր է` Վրաստանից գան նրա հետևից», – գրել են Թվիթերի օգտատերերը։
Իրավապաշտպան մարմինների աշխատակիցների վարժանքներն անցկացվել են ԱՄՆ–ի սպաների վերահսկողությամբ։ Դրանք Վաշինգտոնի առաջարկած` Ուկրաինայի ոստիկանության զարգացման ծրագրի մի մասն են։
