Հայաստանի մի շարք մասնագիտացված վարժարաններում նոր առարկաներ կներդրվեն

ԵՐԵՎԱՆ, 19 օգոստոսի–Sputnik. Հայաստանի մասնագիտացված վարժարաններում նոր ուսումնական տարվանից կներդրվեն երեք նոր առարկաներ` «Տեղեկատվական տեխնոլոգիաներ», «Հեռահաղորդակցության հիմունքներ», «Միկրոէլեկտրոնիկա», գրում է «Հայկական ժամանակ» թերթը։

Նոր առարկաները կներդրվեն Գյումրու «Ֆոտոն», Երևանի «Քվանտ» վարժաններում, Վանաձորի մաթեմատիկայի և բնագիտական առարկաների խորացված ուսուցմամբ հատուկ դպրոցում, Հայաստանի պետական ճարտարագիտական համալսարանի Երևանի ավագ դպրոցում, ինչպես նաև Արտաշես Շահինյանի անվան ֆիզիկամաթեմատիկական հատուկ դպրոցում։

«Նշված առարկաները դպրոց են ներմուծվում ՀՀ կրթության և գիտության նախարարության, VivaCell-MTS–ի, «Սինոփսիս Արմենիա» և «Յունիքոմփ» ընկերությունների միջև ստորագրված համատեղ հուշագրի արդյունքում», – նշում է թերթը։

Նոր առարկաները կներդրվեն ոչ միաժամանակ, այլ հաջորդաբար` 10–րդ, 11–րդ և 12–րդ դասարաններում։

Ինչպես նշել է ՀՀ ԿԳՆ նախադպրոցական և միջնակարգ կրթության քաղաքականության մշակման և վելուծական բաժնի պետ Սյուզաննա Մակյանը, այս նոր առարկաները հանրապետության բոլոր դպրոցներում աստիճանաբար ներդնելու մտադրություն չկա։