Հայաստանը շարունակում է գտնվել արևադարձային տաք օդային հոսանքների ազդեցության գոտում

ԵՐԵՎԱՆ, 19 օգոստոսի – Sputnik. Չորեքշաբթի և հինգշաբթի հանրապետության տարածքը կշարունակի գտնվել արևադարձային տաք օդային հոսանքների ազդեցության գոտում, հայտնում է ՀՀ ԱԻՆ կայքը` հղում անելով Հայպետհիդրոմետին։

Հատկապես հովտային և նախալեռնային գոտիներում սպասվում է բարձր ջերմային ֆոն և բարձր կարգի հրդեհավտանգ իրավիճակ, գյուղատնտեսական մշակաբույսերի մոտ կդիտվի ջրազրկում, որից խուսափելու համար անհրաժեշտ է խիստ կերպով վերահսկել ոռոգման ռեժիմը:

Ազգաբնակչությանը խորհուրդ է տրվում խուսափել ֆիզիկական ակտիվությունից և արեգակի անմիջական ճառագայթների տակ գտնվելուց, հատկապես առողջական խնդիրներ և բաց գույնի մաշկ ունեցող անձինք:

Օգոստոսի 19-ին հանրապետությունում սպասվում է առանց տեղումների եղանակ: 20-22-ին առավելապես հյուսիսային շրջաններում, 23-ին շրջանների մեծ մասում սպասվում է կարճատև անձրև և ամպրոպ:

Քամին կլինի հարավարևմտյան` 2-5 մ/վրկ, ամպրոպի ժամանակ սպասվում է քամու ուժգնացում` 15-20 մ/վրկ:

Օդի ջերմաստիճանը 19-ին կբարձրանա 1-2, արևելյան շրջաններում` 3-5 աստիճանով, 21-23-ին կնվազի 4-5, արևելյան շրջաններում` 7-8 աստիճանով:

Երևանում օգոստոսի 19-ին սպասվում է առանց տեղումների եղանակ, 21-22-ի երեկոյան ժամերին հնարավոր է ամպրոպ, անձրևի հավանականությունը փոքր է, 23-ի երեկոյան ժամերին սպասվում է կարճատև անձրև և ամպրոպ: Ամպրոպի ժամանակ հնարավոր է քամու ուժգնացում` 15-20 մ/վրկ արագությամբ:

Ըստ Հայպետհիդրոմետի տվյալների` Երևանում օգոստոսի 19-ի բազմամյա կլիմայական տվյալները հետևյալն են` օդի առավելագույն ջերմաստիճան` 36.7 աստիճան, դիտվել է 1993 թ.-ին, օդի նվազագույն ջերմաստիճան` 9.8 աստիճան` 1977 թ.-ին, օդի միջին օրական ջերմաստիճանն այս շրջանում 25.0 աստիճան է։