Անձրևների պատճառով սահմանափակվել է Ռազմական–վրացական ճանապարհի երթևեկությունը

ԵՐԵՎԱՆ, 18 օգոստոսի– Sputnik. Կանխատեսվող հորդառատ անձրևների պատճառով մինչև օգոստոսի 30–ը կսահմանափակվի տրանսպորտի երթևեկությունը Դարիալի կիրճի Ստեփանծմինդա–Լարս ավտոճանապարհին, հաղորդում է Վրաստանի տարածաշրջանային զարգացման և ենթակառուցվածքի նախարարության ավտոճանապարհների դեպարտամենտը։

Երթևեկության սահմանափակման մասին որոշումն ընդունվել է հորդառատ տեղումների մասին կանխատեսման հիման վրա։ Դեպարտամենտի տեղեկատվությամբ` Թբիլիսիի ժամանակով ժամը 00։00–ից մինչև 05։30–ը արգելված է ցանկացած տեսակի ավտոտրանսպորտի երթևեկությունը Դարիալի կիրճով։

Մարդատար ավտոմեքենաների երթևեկությունը կփակվի 20։30–ից, իսկ 00։00–ից կարգելվի կցասայլով, կիսակցասայլով և ավելի քան 30 տեղանոց ավտոբուսների երթևեկությունը։

Միաժամանակ 20։30–ին կարգելվի երկու և ավելի ավտոբուսների, կցասայլով կամ կիսակցասայլով ավտոմեքենաների  միաժամանակ ընդառաջ երթևեկությունը։

Ավտոճանապարհների դեպարտամենտը զգուշացնում է, որ հորդառատ անձրևների դեպքում Դարիալի կիրճով երթևեկությունը կփակվի արդեն Թբիլիսիի ժամանակով 20։30–ից։

«Մնացած ժամերին բոլոր տեսակի տրանսպորտային միջոցների երթևեկությունն ազատ կլինի», – նշվում է հաղորդագրության մեջ։