ԱԳՆ. Բանգկոկում պայթյունի հետևանքով տուժածների և մահացածների շարքում հայեր չկան

ԵՐԵՎԱՆ, 18 օգոստոսի– Sputnik. Թաիլանդի մայրաքաղաքում պայթյունի հետևանքով տուժածների և մահացածների շարքում հայեր չկան, Sputnik-Արմենիա կայքին հայտնեցին Հայաստանի ԱԳՆ–ից։

Բանգկոկի կենտրոնի գործարար և տուրիստական հատվածում երկուշաբթի Երևանի ժամանակով ժամը 15։56–ին Ռատչապրասոնգ խաչմերուկում պայթյուն է որոտացել։ Ինքնաշեն ռադիոկառավարվող ռումբը տեղադրվել է Amarin Plaza առևտրային կենտրոնի և Grand Hayatt Erawan հյուրանոցի մոտակայքում գտնվող  հնդուիստական Էրավան (երեքգլխանի սուրբ փիղ) կուռքի տաճարի ցանկապատի մոտ այն պահին, երբ տաճարում բազմաթիվ այցելուներ են եղել, որոնց մեծամասնությունը զբոսաշրջիկներ են եղել` Չինաստանից, Սինգապուրից և Թայվանից։

«Բանգկոկում մահացածների և վիրավորների շարքում հայեր չկան»,– նշեցին Հայաստանի ԱԳՆ մամուլի ծառայությունում։

Երեքշաբթի երեկոյան պաշտոնական տվյալների համաձայն, 20 հոգի մահացել է, նրանցից ութի անձը դեռ չի հաստատվել։ Ահաբեկչության արդյունքում վիրավորվել է 123 մարդ։