Սելֆիները կարող են բացահայտել մարդկանց բնավորությունը

ԵՐԵՎԱՆ, 18 օգոստոսի–Sputnik. Այն, թե մարդն ինչ ձևով է լուսանկարում իրեն, նրա մասին ավելին է պատմում, քան այն, թե ինչ տեսք ունի նա, համոզված է Սինգապուրի Նանյան տեխնոլոգիական համալսարանի հոգեբանության պրոֆեսոր Լին Ցյուն, գրում է www.vokrugsveta.ru կայքը` հղում անելով The Independent–ին։

Գիտնականն ուսումնասիրություն է կատարել Twitter–ի նմանակ չինական սոցցանցում կանոնավոր կերպով սելֆի անող օգտատերերի շրջանում և եկել է այն եզրահանգման, որ սելֆիի համար դիրք ընդունելու առանձնահատկությունները կապ ունեն մարդու բնավորության որոշակի գծերի հետ։ Այսպես, հաճելի և բարյացակամ մարդիկ սելֆիներում հաճախ ժպտում են և լուսանկարվում ներքևից։ Նոր փորձերի պատրաստ մարդիկ սոցցանցերում հրապարակում են ավելի շատ դրական սելֆիներ։

Բարեխիղճ մարդիկ հազվադեպ են լուսանկարներ անում, որոնց ֆոնից կարելի է որոշել նրանց գտնվելու վայրը։ Իսկ դյուրագրգիռ և զգացմունքային առումով  անկայուն մարդիկ, որպես կանոն, ուռեզնում են շրթունքները։

Միաժամանակ ԱՄՆ–ի Օհայո նահանգի համալսարանի գիտնականները, ովքեր նմանատիպ ուսումնասիրություն են անցկացրել, եկել են այն եզրակացության, որ տղամարդկանց շրջանում սոցցանցերում ավելի շատ սելֆիներ են տեղադրում նրանք, ովքեր ունեն նարցիսիզմի բարձր մակարդակ կամ անձնային խանգարումներ։

Սելֆիները 2014 թ.–ին զբաղեցրել են երկրորդ տեղը արձակուրդի ժամանակ արված ամենանյարդայնացնող լուսանկարների վարկանիշում։ Բրիտանացիների շրջանում ամենաշատ բացասական զգացողություններ են առաջացրել iPhone –ից արված screenshot–երը` հանգստավայրում եղանակի կանխատեսման մասին։