Air Armenia–ի տնօրենին ծեծի ենթարկելու վերաբերյալ նյութերն ուղարկվել են Քննչական կոմիտե

ԵՐԵՎԱՆ, 18 օգոստոսի– Sputnik. Air Armenia ավիաընկերության սեփականատեր և տնօրեն Արսեն Ավետիսյանին ծեծի ենթարկելու վերաբերյալ  նյութերը Ավան և Նոր Նորք վարչական շրջանների դատախազի պահանջով երեքշաբթի  հետաքննության մարմնից  ուղարկվել են դատախազություն, հաղորդում է ՀՀ գլխավոր դատախազության մամուլի ծառայությունը։

Հայկական ԶԼՄ–ների տեղեկատվության համաձայն`  Հայաստանի ֆուտբոլի ֆեդերացիայի նախագահ Ռուբեն Հայրապետյանի թիկնազորի անդամները շաբաթ օրը առևանգել են գործարար, «Էյր Արմենիա» (Air Armenia) ավիաընկերության 51 տոկոսի սեփականատեր և տնօրեն Արսեն Ավետիսյանին և նրան ծեծի ենթարկել: Մամուլի հրապարակումների համաձայն` Ավետիսյանն այժմ գտնվում է մայրաքաղաքի հիվանդանոցներից մեկում` «քթի ոսկրերի կոտրվածք ոչ մեծ թեքվածությամբ» ախտորոշմամբ։

Ինչպես նշվում է Գլխավոր դատախազության մամուլի ծառայության հաղորդագրության մեջ, նույն օրը նախապատրաստված նյութերը, համապատասխան հանձնարարությամբ,  ուղարկվել են նախաքննական մարմնին՝ ՀՀ քննչական կոմիտե՝  քր. դատ. օր.-ի  180-րդ,  181-րդ հոդվածների կարգով ընթացքը լուծելու համար:

ՀՀ  քր. դատ. օր.-ի  180-րդ հոդվածը նախատեսում է հանցագործությունների մասին տեղեկությունների ուսումնասիրման կարգ, իսկ 181–րդ հոդվածը կարգավորում է այդ տեղեկությունների ուսումնասիրման արդյունքում ընդունված որոշումներին վերաբերող հարցերը։

ԶԼՄ–ների տվյալներով` կոնֆլիկտը ծագել է այն ժամանակ, երբ «Տարոն–ավիա» ավիաընկերության սեփականատեր Գառնիկ Պապիկյանը դիմել է Ֆուտբոլի ֆեդերացիայի նախագահին «Air Armenia»–ի պարտքը վերադարձնելու հարցում օգնելու խնդրանքով։

Ֆուտբոլի ֆեդերացիան դեռ ոչ մի կերպ չի մեկնաբանել այս տեղեկությունը։