ԵՐԵՎԱՆ, 18 օգոստոսի – Sputnik. Երևանի երգի պետական թատրոնի մեներգիչ, «Հայաստանի ձայնը» նախագծի մասնակից Գրիգոր Կյոկչյանը ելույթ կունենա «Նոր ալիք 2015» մրցույթում, որը կանցկացվի Սոչիում հոկտեմբերի 2–ից 11–ը։
Նա պատրաստվում է մրցույթում ներկայացնել իր հեղինակած «Աֆրո» երգը։
«Շատ կրեատիվ երգ է աֆրիկյան հյուսերով և դեղին զգեստով աղջկա մասին։ Սյուժեն սա է` ես պատահաբար մի աղջիկ եմ տեսնում և գնում նրա հետևից»,– պատմեց Կյոկչյանը «Sputnik-Արմենիա» պորտալին։
Կյոկչյանը Ղրիմի «Մանկական Նոր ալիք 2015» մրցույթում երրորդ տեղը զբաղեցրած 12–ամյա երգչուհի Մերի Քոչարյանի պրոդյուսերն է։
Երգչի խոսքով, նրա նոր երգն աֆրիկյան մոտիվներ ունի։ Երաժշտության հեղինակը Մարտին Միրզոյանն է։
«Երգն ինքնակենսագրական է։ Ինչպես և մյուս իմ երգերը, այն սեփական պատմություն ունի»,– ասաց Կյոկչյանը, ավելացնելով, որ շուտով ծրագրվում է նաև տեսահոլովակ նկարահանել «Աֆրոյի» համար։
Խոսելով հետագա ծրագրերի մասին` երգիչը պատմեց, որ Երգի թատրոնի թիմի կազմում պատրաստվում է հյուրախաղերի մեկնել Ֆրանսիա` հայ կոմպոզիտոր Կոմիտասին նվիրված ծրագրով։
